Сывæллæтты зындгонд уырыссаг классикты сфæлдыстадмæ æмхиц кæндзысты, стæй сын нæ бæстæ æмæ Цæгат Ирыстоны историйы хъæздыгдзинад æвдисдзысты. Гергиты Ларисæ амондзæн уроктæ республикæйы скъолаты 10 театры. Фыццаг ныридæгæн сарæзтой 5-æм гимназы. Уæрæсейы адæмон артисткæйæн сывæллæттæ цымыдисаг равдыст бацæттæ кодтой. Азарыдысты зарæг «Аллилуйя» æртæ æвзагыл – ирон, уырыссаг æмæ англисагыл. Бакастысты æмдзæвгæтæ, акафыдысты. Иудзырдæй – равдыстой алцыдæр, цæуыл сæ сахуыр кодтой сæ хъомылгæнджытæ. Уый уыд райдианы урок. Дарддæр та бакусдзысты сæ рæдыдтытыл æмæ сæ курдиаты рæзтыл.
Сфæлдыстадон иугондтæ байгом кæндзысты Дзæуджыхъæуы 3-æм, 5-æм, 7-æм, 27-æм, 41-æм æмæ 42-æм скъолаты, алайнаг гимназы, Дур-Дуры 1-æм æмæ Беслæны 8-æм скъолаты. Ахуырадон программæйы ма бацархайдзысты режиссертæ дæр. Хуыздæр спектакльтæ равдисдзысты Мариинаг театры Цæгат Ирыстойнаг филиалы. Гергиты Ларисæ йæхæдæг каст фæцис 5-æм гимназ. 1967-æм азæй нырмæ фыццаг хатт æрбацыд йе ‘скъоламæ. Скъоладзаутæн йæ зæрдæ загъта, цæмæй æппынæдзух хъæддых лæууой, патриоттæ уой æмæ сæ фидæны дæсныйæдты бæрзонд къæпхæнтæм схизой.
