Чысиаты Мæдинæ йæхи рынчындонæй рафыссынмæ цæттæ кæны. Дадзинты хирург Дзуццаты Виталий пациенткæйы уавæрмæ æппынæдзух кæсы. Цæст дары, цæмæй æппæт амынддзинæдтæ æххæст кæна. Йæ низыхатт зонгæ дæр куы нæма кодта сылгоймаг, ууыл 10 боны едтæмæ нæма рацыд. Ныллæмæгъ, йæ развæндаг хорз нал уыдта, суанг ма дзурынмæ дæр нал арæхсыд.
Сæрымагъзы тугзмæлды тынг фехæлдимæ Мæдинæйы сæвæрдтой Республикон клиникон рынчындоны неврологийы. Дохтыртæ йын МРТ скодтой æмæ уый дæр равдыста инсульт. Фæлæ сылгоймаг йæхи æвзæр кæй æнкъардта, уымæй уый иунæг аххосаг нæ уыд. КТ равдыста — сæрымагъз тугæй ифтонггæнæг дадзин фехгæдта, туджы къуыбар дзы фæзынд. Операци хъуыди скæнын æвæстиатæй.
Тромб цæмæн фæзынд, уый бæлвырд зæгъæн нæй. Фæлæ рынчындонмæ бахауынæй 10 бон раздæр сылгоймагæй райгуырд æртыккаг сывæллон. Чысыл София йæ мадмæ хæдзары æнхъæлмæ кæсы. Æмæ йæм тагъд æнæнизæй æрбаздхдзæн йæ ныййарæг. Дохтыртæ ахæм операци фыццаг хатт не скодтой, фæлæ уæддæр стæм у ацы диагноз. Хъыгдард цы дадзин баййæфта, уый трансплантантæй ивын бахъуыд. Уый къахæй систой.
Дадзинты хирургийы хайады разамонæг Дзуццаты Виталий фидарæй зæгъы, Мæдинæйы низ нал фæкарз уыдзæн. Æрмæст дохтырты амынддзинæдтæ æххæст кæнæд. Æмæ хæстæг рæстæг йæ цотимæ иумæ царды хорздзинæдтыл цин кæндзæн.
