Сергей Меняйлойы разамындæй уыд æрвылкъуырион аппаратон æмбырд

Цæгат Ирыстоны эпидемиологон уавæр тæссаг нæу. Карантины сæхгæдтой сывæллæтты иу рæвдауæндон. Уый тыххæй фехъусын кодтой аппаратон æмбырды. Кæронмæ æрхæццæ фæззыгон дзæбæхгæнæн кампани дæр. Сæ рæстæг хъæлдзæг æмæ пайдаимæ арвыстой 7,5 мин сывæллоны. Райдыдта иумæйаг паддзахадон фæлварæнмæ цæттæгæнæн рæстæг. 3-æм декабры, 3,5 мин рауагъдонæй фылдæр ныффысдзысты кæронбæттæн нывæцæн. Уый сын ратдзæн экзаменмæ бахауыны бар. Ныхас цыд инфраструктурæйы райрæзтыл дæр. Къуыри фæстæ фæуыдзæн 4-æм трансформаторон дæлстанцæйы цалцæг. Уымæй уæлдай ма, куыд фехъусын кодтой, афтæмæй горæты маршруттæм рацæудзæн 20 ног трамвайы. Æрдзырдтой ма зымæгмæ цæттæгæнæн мадзæлттыл. Дзæуджыхъæуы мэры ныхæстæм гæсгæ, балхæдтой змис æмæ цæхх, уыимæ техникæйы 5 иуæджы.