Цæгат Ирыстоны хицауады сæрдар Дзанайты Барис кусæг балцы уыд Рахизфарсы районы. Бабæрæг кодта Беслæны 5-æм скъола. Федедералон программæмæ гæсгæ йæ хъуамæ дыууæ азмæ бындуронæй сцалцæг кæной. Премьер федта терроризмы профилактикæйы æппæтадæмон культурон-патриотон центры цæттæдзинад дæр. Объектмæ ис бæстон цæстдард. Районы разамындимæ ныхас цыд районы социалон-экономикон райрæзтыл дæр. Кусæг балцы хатдзæгты тыххæй ме ‘мкусджыты æрмæг.
Беслæны фæндзæм скъолайыл 40 азæй фылдæр цæуы. Бындуронæй цалцæггонд никуы уыд. Баивын хъæуы хъармгæнæн æмæ электронтыхдæттæг системæтæ. Ахуыргæнæндон хаст æрцыд федералон программæмæ. Дыууæ азмæ йæ хъуамæ рацаразой. Уый тыххæй снысан кодтой 100 милуан сомы бæрц. Дарддæр Дзанайты Барис бабæрæг кодта Беслæны мемориалон комплекс. Ам аразынц терроризмы профилактикæйы æппæтадæмон культурон-патриотон центр. Проектмæ гæсгæ сног кæндзысты скъолайы дыууæуæладзыгон бæстыхай. Йе ‘ддаг хаймæ йын нæ бавналдзысты. Скæндзысты вентиляцийы системæ дæр.
Проектмæ гæсгæ объект бахъахъхъæнынæн бæстыхайæ нал пайда кæндзысты. Уæлдай æргом здæхт цæуы архитектурон бакастмæ дæр. Уый тыххæй æм зынгæ ивддзинæдтæ хаст не ‘рцæудзæн. Куыстыты фæстæ ам байгом кæндзысты музейон комплекс экспозициты сæрмагонд залтимæ. Объектмæ ис бæстон цæстдард.
Районы социалон-экономикон райрæзтыл æрдзырдтой Беслæны администрацийы. Ныхас цыд бæстæйы Президент цы программæ сфидар кодта, ууыл. Ис дзы 38 мадзалы. Нысангонд сын æрцыд 3 æмæ æрдæг миллиард сомы.
Премьер фæнысан кодта, æппæт куыстытæ дæр кæй хъæуы нысангонд æмгъуыдмæ бакæнын. Уый тыххæй та дзуаппдæттæг ведомствæтæ хъуамæ кæной мониторинг. Фарстамæ йæ хъус дары Хицауады сæрдар.
