Цæгат Ирыстоны экономикон рæзты министр Кучиты Зауыр бабæрæг кодта Мæздæджы районы агропромышленнон комплекстæ. Хуыздæр базонгæ компаниты куыстимæ, федта, тагъд рæстæджы кӕй байгом кӕндзысты, уыцы кондадты уавæр. Уый фæстæ министр фембæлд амалхъом адæмимæ. Бæлвырддæр нæ дарддæры æрмæджы.
Ам кæнынц къалбӕсты алы хуызтæ. Стыр æргом здæхт цæуы хойраджы хæрзхъæддзинадмæ. Уымæ гæсгæ пайда кæнынц нырыккон кусæнгарз æмæ ног технологитæй, æппæт домæнтæ хынцгæйæ. Куыстуаты архайдмæ æркаст экономикон рæзты министр Кучиты Зауыр.
Дзидзайы куыст чи кæны, уыцы завод Мæздæджы 12 азмæ сси раззагдæр куыстуæттæй иу æгас Цæгат Кавказы. Суткæмæ дзы бакусынц дзидзайы 12 тоннæйыл. Куыстуаты ахсджиаг хъуыддаг ма у куысты бынæттæ.
Куысты бынæтты нымӕц ӕмӕ заводы стыр хъомыс районы социалон-экономикон рæзтмæ хæссынц ахадгæ бавæрæн. Хъыгагæн, уавæрыл æвзæрырдæм сахадыд инфляци. Уый аххосæй продукцийы æргътыл бафтыд. Уæвгæ, уый сæ хæрзхъæддзинадыл нæ фӕзынд.
Ацы æрх скъахтой кӕфты мыггаг парахат кæнынæн. Кæсагдарыны куыстуат аразын райдыдтой. Кусджытæн дзы фæзындзæн дыууæуæладзыгон бæстыхай. Инвестицион проекты фæрцы парахат кæндзысты осетр æмæ валер кæсаджы мыггæгтæ. Хæстæгдæр рæстæг сӕм фæзындзæн ноджы 15 бассейны.
Агро-промышленнон комплексты инспекцийы фæстæ бæрнон адæм æрдзырдтой чысыл æмæ рæстæмбис амалхъомады рæзтыл регионы. Зӕгъӕм, Цæгат Ирыстоны пандемийæйы рæстæг амалхъомады æххуысæн æххæст кæнынц цалдæр сæрмагонд программæйы. Афтӕ, фæллойы министрад дæтты социлон гранттæ 250 мин сомæн, экономикон рæзты министрад та 500 мин сомы онг.
Фæлæ Мæздæджы районы уыцы æххуысæй афтæ разæнгардæй нæ пайда кæнынц.
Ууыл дзурæг сты ӕхцайы фӕрӕзтӕ цас лӕвӕрд цӕуы, уыдоны бæрц дæр. Микрофинансированийы фонды бæрæггæнæнтæм гæсгæ ацы аз Мæздæджы район грантты хуызы райста 4 милуан сомы. Фарон уыцы бæрæггæнæн уыд 21 милуаны.
Стыр ретейл чысыл бизнесыл куыд ахады, ууыл дзырдтой хицæнæй. Æмткæй райсгæйæ, бизнес-сесси йæ хъомыс равдыста. Къабазы кусджытæ æрдзырдтой бирæ райхалинаг фарстатыл. Кæронбæттæны бæрнон кусджытæм разынд Мæздæджы районы чысыл амалхъомады минæвæрад байгом кæныны хъæппæрис.
