Сбæрæг сты профессионалон дæсныдзинады чемпионат “Абилимпикс”-ы уæлахиздзаутæ

Сбæрæг сты профессионалон дæсныдзинады чемпионат “Абилимпикс”-ы регионалон къæпхæны уæлахиздзаутæ. Архайдтой дзы се ‘нæниздзинад хъыгдæрд кæмæн у, ахæм фæсивæд. Республикæйы чемпионат арæзт цæуы ныр 8-æм хатт. Ацы аз дзы архайдтой 215 лæппу æмæ чызджы æмæ 140 эксперты. Агрономтæ, ветиринартæ, графикон дизайн, ирон чъиритæ кæныны дæсныйад æмæ æндæртæ. Къуырийы дæргъы 14 азæй фылдæр кæуыл цæуы, уыцы скъоладзаутæ, уæлдæр æмæ астæуккаг ахуыргæнæндæтты студенттæ, ныридæгæн кусгæ чи кæны, ахæм специалисттæ ерыс кодтой 37 компетенцийы. Ахуырад æмæ наукæйы министр Алыбегты Эллæ куыд фæнысан кодта, афтæмæй архайджыты нымæц дыууæ хатты фæфылдæр. Уый ахсджиаг ивддзинад у. Ацы фæзты ма фенæн ис фидæны куыстдæтджыты дæр. Сæхи хорз чи равдиса, уыдонæн фадат ис куысты бынат ссарын республикæйы раззагдæр компаниты. “Абилимпикс”-ы уæлахиздзаутæн радтой майдантæ æмæ Кады гæххæттытæ. Ныр та сæ размæ лæууы ахсджиаг хæс – Цæгат Ирыстоны кад федералон къæпхæны бахъахъхъæнын.