Бонмæ Михайловскæйы ветеринарон клиникæ райсы дæсгай цæрæгойы. Командæйы сæйраг нысан – æмбæлгæ æххуыс бакæнын. Гæдыдты æмæ куыйты æнæниздзинады уавæр раитртасынæн специалисттæ пайда кæнынц нырыккон кусæнгæрзтæй. Раздæр америкæгтæ уыдысты. Ныр фæстаг дыууæ азы та пайда кæнынц Китайы уагъд техникæйæ. Фæивта хосты номхыгъд дæр. Раздæр уыдон дæр фæсарæнтæй ласт уыдысты. Ныр сæ æнтыстджынæй фæивтой бæстæйы уагъд препараттæй.
Зæгъæн ис, æм хостæ иууылдæр фæивтой. Базарады рæзынц Уæрæсейы, Китай æмæ Белоруссийы фармкомпанитæ. Анестезийæ дæр ног æмвæзадмæ рахызт. Раздæр пайда кодтой Францийæ ласт препараттæй, уыдон иу цæрæгойы уайтагъд наркозы бафтыдтой. Санкциты рæстæг скадавар ис. Фæлæ дохтыртæ рахастой уынаффæ газы хуыз наркозмæ рахизын. Афтæмæй, ацы наркоз æмæ рыст къаддæр кæнæн хосты руаджы цыппæркъахыгтæ цалдæр сахатмæ сæхимæ æрцæуынц. Фæлæ куыст хуыздæр кæныныл архайд цæуы. Онкологон низтæ, сæкæрниз дзæбæх кæнынæн хостæ уæддæр нæ фаг кæны.
Бæстæйы базарад æнтсытджынæй пайда кæны бæстæйы уагъд холлагæй. Ам дæр йæхи хицæндзинæдтæ ис. Цæрæгойты алы мыггагæн дзы ис алы хуызтæ. Хойраг уадзджытæ суанг цæрæгойты кар æмæ æнæниздзинады уавæрдæр хынцынц. Уымæй уæлдай ма æнтыстджынæй æмгуыст кæнынц ветеринарон клиникæтимæ.
Ветеринарийы къабаз æнтыстджынæй рæзы. Рæстæджы домæнтимæ æмдзу кæны. Ивынц дзæбæхгæнæн протоколтæ, пайда кæнынц ног препараттæ æмæ техникæйæ. Специалистты ныхæстæм гæсгæ, кондады архайджытæ дарддæр дæр афтæ цырдæй куы архайой, уæд къабаз æнæмæнг рæздзæн.
