Сергей Меняйло дарддæр бæрæг кæны, социалон объектты арæзтад куыд цæуы республикæйы, уый. Ацы хатт регионы разамонæг арæзтад æмæ архитектурæйы министры хæстæ рæстæгмæ æххæстгæнæг Моргуаты Константинимæ уыд Горæтгæрон районы.
Ныртæккæ дзы аразынц 7 ахуыргæнæндоны. Черменыхъæуы нацпроекты руаджы аразынц 360 бынатæн скъола. Байгом уыдзæн 2021 азы. Спортивон æмæ актон залтæ, уæрæх кабинеттæ, чызджытæ æмæ лæппутæн æрмадзтæ. Ныртæккæ объект у 90 проценты бæрц цæттæ. Раздæр Сергей Меняйло Пятигорскы Михаил Мишустинимæ кусæг фембæлды рæстæг бахаста курдиат скъолайы арæзтад кæронмæ ахæццæ кæнынмæ æххуыс бацагурыны тыххæй. Федералон бюджетæй куыстытæн рахай кодтой 23 милуан сомæй фылдæр.
Ног скъолайы руаджы Черменыхъæуы 3-æм скъола дыууæ фæлтæрæй изæр-райсом нал кусдзæн. Кæд æмæ дзы бынат ис 550 адæймагæн, ахуыр та дзы кæнынц 2 хатты фылдæрæй. Дарддæр кусынц хъæуы 120 бынатæн рæвдауæндоны арæзтадыл дæр. Бантыст сын фыццаг уæладзыг саразын. Ног къуыри рахиздзысты дыккаг уæладзыгмæ. Объекты куыстытæ цæуынц фæткмæ гæсгæ.
Уымæй уæлдай ма, Сергей Меняйло федта Дæллаг Санибайы рæвдауæндон дæр. Бынат дзы уыдзæн 120 сабийæн. Кусæг балцы кæронбæттæны республикæйы сæргълæууæг фæнысан кодта, объекттæ хъуамæ цæттæ кæй уой нысангонд рæстæгмæ. Уæлдай æргом аздæхта куыстыты хæрзхъæддзинадмæ.
