Цæгат Ирыстон æмæ Уæрæсейы донуадзæн æмæ дондзæуæн системæты ассоциацийы æмгуыстады фарстатыл кусæг фембæлды æрныхас кодтой Сергей Меняйло æмæ куыстуаты æххæстгæнæг директор Елена Довлатова.
Ныхас цыд ассоциацийы сæйраг къабæзтыл, федералон хицауад æмæ регионтимæ æмгуыстадыл. Сергей Меняйло куыд фæнысан кодта, афтæмæй республикæйы дондзæуæн системæты рæзт у ахсджиаг фарста. Фембæлды архайджытæ баныхас кодтой регионы иумæйаг доны куыстуат саразыныл. Уый руаджы фæуæлдæр уыдзæн цæрджыты экологон æдасдзинад. Бакусдзысты субъекты иу дондзæуæн системæйы схемæйыл бынаты рельеф æмæ доны æвæрæнтæ хынцгæйæ. Уыимæ ма, сараздзысты республикæйы къабазы рæзты инвестицон программæ.
Ассоциаци цæттæ у Цæгат Ирыстонæн уыцы фарстайы баххуыс кæнынмæ. Терчы дон фæсыгъдæгдæр кæнынæн дæр арæзт æрцæудзæн сæрмагонд программæ. Куыстытæ баххæст кæндзысты федералон программæмæ гæсгæ. Ныр уал хъæуы æмбæлгæ æрмæджытæ бацæттæ кæнын, цæмæй фæрæзтæ сбæрæг кæной.
