Сергей Меняйло разамындæй уыд æврвылкъуырион аппаратон æмбырд

2 мин рауагъдонæй фылдæр абон лæвæрдтой иумæйаг паддзахадон фæлварæн биологи, географи, æмæ фæсарæйнаг æвзæгтæй. Фæлварæнты сæйраг мгъуыд фæуыдзæн ацы къуыри. Зæгъын хъæуы уый, æмæ Цæгат Ирыстоны 15 адæймаджы райстой 100 баллы. Уый тыххæй Аппаратон æмбырды фехъусын кодта ахуырад æмæ наукæйы министр Алыбегты Эллæ. Уыимæ ма райдыдта курдиæттæ исыны кампани скъолаты бындурон цалцæгмæ – рады 30 объекты. Бындурон цалцæг аххæсдзæн скъолайы агъоммæ ахуырадон объектыл дæр, курдиæттæ цæттæ кæнынц 67 рæвдауæндоны. Министр фæнысан кодта, республикæйы 6 районы сног кодтой æппæт скъолатæ. Ныхас ма цыд метеорологон уавæрыл дæр. Абон æмæ райсом републикæйы тæссаг у æвзæр боныхъæдæй. 14 июны тыхджын къæвдаты аххосæй уарыны дон бакалд Æрыдоны æмæ Рахизфарсы районты цалдæр хъæуы хæдзæрттæ æмæ ныккæндтæм. Фæстиуджытæ иуварсгонд æрцыдысты цæрæнуæтты коммуналон хæдзарад, артаг æмæ энергетикæйы æмæ æнæнхъæлæджы уавæрты министрадты, стæй муниципалон скондты тыхтæй. Сергей Меняйло фæсидт республикæйы хицауадмæ, цæмæй цæст дарой оперативон уавæрмæ æмæ æнæнхъæлæджы цауты рæстæг æвæстиатæй бацархайой.