Социалон объектты арæзтад, Аланийы аргъуыды 1100 азы бæрæгбонмæ цæттæдзинад, национ проекттæ æмæ паддзахадон программæты райрæзтыл ныхас цыд хицауады æмбырды. Амыдта йæ премьер Дзанайты Барис.
Республикæйы экономикон райрæзты министр Кучиты Зауыр радзырдта, регионы паддзахадон программæтæ куыд æххæстгонд цæуынц, уый тыххӕй. Йæ ныхæстæм гæсгæ, ацы аз социалон-экономикон къабазы регионы 21 паддзахадон программæ сæххæст кæныны фарстатæн рахай кæндзысты 24 млрд сомы.
Бæстонæй ныхас цыд Цæгат Ирыстоны экономикон райрæзтæн ахсджиагдæр проекттыл. Йæ бындуры ис 5 проекты сæ иумæйаг аргъ у 64 млрд сомы. Ацы азы дыккаг кварталы бæрæггæнæнтæм гæсгæ нæ республикæ Цæгат Кавказы у иунæг, раззагдæр ӕмӕ ахсджиагдæр проекттæ афойнадыл кæм æххæст кæнынц. Уыимæ ма республикæйы агропромышленон кластер ис цыппæрæм бынаты, куысты бынæттæ æппæты фылдæр чи дæтты, уыдоны ‘хсæн.
Æмбырды ма ныхас цыд Аланийы аргъуыды 1100 азы бæрæгбонмæ цæттæдзинадыл. Сæрмагонд мадзæлттæ республикæйы цæудзысты къуырийы дæргъы. Ацы историон цауæн ис стыр ахадындзинад. Цæттæгæнæн куыстытæ цыдысты цалдæр азы дæргъы. Сног кодтой культурон объекттæ, байгом кодтой равдыстытæ. Æнхъæлмæ кæсæм бирæ уазджытæм. Ныртæккæ ахсджиаг у куыст бæстонæй æххæст кæнын, цæмæй бæрæгбон ацæуа бæрзонд æмвæзадыл, – бафиппайдта Дзанайты Барис.
