Белоруссийы ацыд уæззау атлетикæйæ гом чемпионат. Нæ спортсменкæтæ Сотиты Янæ æмæ Гусалты Зæринæ ссисты уæлахиздзаутæ. Зыгърæн майдантæ райсынæй уæлдай сын бантыст рекордтæ сывæрын. Ныртæккæ сæхи цæттæ кæнынц Уæрæсейы чемпионатмæ.
Ацы спорт адæймаджы кæны быхсондæр æмæ хъæддыхдæр. Соттиты Янæ уæззау атлетикæйы хи фæлвары 10 азы. Фыццаг хатт æй эзалмæ æрбакодта йæ мад. Ныридæгæн та йæ тренер Дзгойты Олег æмæ Тæсойты Æхсарбегимæ æнтыстджынæй архайы алыхуызæн æмвæзадыл ерысты. Æрæджы уыд Белоруссийы чемпионаты. Райста сызгъæрин майдан 81 килограмм категорийы. Бантыст ма йын Уæрæсейы рекорд сæвæрын дæр.
Янæйæ уæлдай ма сызгъæрин райста 18 аздзыд Гусалты Зæринæ. Æрыгон спортсменкæйæн ма бантыст бæстæйы æртæ рекорды баххæст кæнын. Хиуылкуыст æмæ æппынæдзух тренировкæтæй уæлдай, ахсджиаг у тренертимæ архайд. Чызджытæн спорты сусæгдзинæдтæ амонынц фæлтæрдджын специалисттæ.
Уæззау атлетикæйæ чемпионат ацыд Могилевы 2-æй 8-æм майы онг. Мадзалы уыд 250 архайæгæй фылдæр. Цæгатирыстойнаг спортсментæ сæхи равдыстой æнтыстджынæй.
Ерыстæ кæронмæ æрхæццæ сты хæрзæрæджы, чызджытæ та сæхи цæттæ кæнын райдыдтой Уæрæсейы чемпионатмæ. Ацæудзæн сæрды Ног Уренгойы. Æмæ кæд нæ спортсменкæты нырма нæ уадзынц æппæтадæмон ерыстæм, уæддæр зæ зæрдæ хуыздæрыл дарынц.
