Саракæй конд дзаумæтты къухы хъарм бауадзын, уыимæ дзы саразын ирд аивадон фæзынд. Фæлæ дзы цалынмæ æцæг дзаумæ рауайы, уæдмæ йыл иу æмæ дыууæ боны нæ фæфыдæбон кæны æрмдæсны. Тебиаты Давид ацы куыстæн снывонд кодта йæ цард. Йæ къухвæллойæ рацыд 2000 дзаумайæ фылдæр. Æрæджы та сси проект «Alania Business Accelerator»-ы архайæг.
Сæрмагонд гарзы æххуысæй сæрачы гæбазæй рауайы æхцайы чыссæ, паспорты æддаг цъар æмæ æрвылбон цы дзауматтæй фæбайда кæнæм, ахæмтæ. Куыст цæуы сæрмагонд фæткмæ гæсгæ. Тебиаты Давид ныр 5 азы бæрц кусы сæракимæ. Кæд инженер-амайæжы дæсныйад райста, уæддæр ын ацы хъуыддаг зæрдæмæ хæстæгдæр у. Давид нырма саби уыд,фæлæ йæ хорз хъуыды кæны йæ хæстæгмæ фыццаг хатт рагон хуызисæн куы федта, уæд йæ цæст уайтагъд ацахста сæракæй конд футляр. Ныр ацы æвидийгæ хæзна йæ кусæнуаты ахсы фыццаг бынат.
Давидæн йæ алы куыст дæр у хъæрмуд, уымæн æмæ сæ кæны йæхи къухтæй. Йæхæдæг куыд зæгъы, афтæмæй, йæ аивадон куыст æппынæдзух йæхимæ æлвæста, уымæ гæсгæ йæ цард ацы куыстæн кæй снывонд кодта, ууыл нæ фæсмон кæны. Хæссы йын удæнцой.
Зæгъын хъæуы уый, æмæ Давиды инженер-амайæджы дæсныйад сæракимæ кусынмæ нæ хъыгдары. Цы зоныныдзинæдтæ райста уæлдæр ахуыргæнæндоны уыдонæй йæ бон у спайда кæнын ам дæр. Фыццаг уал скæнын хъæуы эскиз. Дарддæр фидæны дзаумайы модель. Алцыдæр фæткмæ гæсгæ. Сæрæн æмæ уæлдай арæхстдзинады хицауы къухтæй рауайы диссаджы дзаумæттæ сæракæй. Фæнысан кæнын хъæуы уый, æмæ кæй пайда кæны хæрзхъæд Италиаг сæракæй. Давиды къухвæллойæ рацыд 2000 мин дзаумайæ фылдæр, уыимæ сæ хицæуттæй алчидæр Давиды куыстæй разыйæ баззад. Рæстæг куыд цыд, афтæ уæрæхдæр кодтой йæ гæнæнтæ дæр, ныр йæ куыстытыл фæзынд сæрмагонд нысан дæр-логотип. Æрмдæсны йæхæдæг куыд зæгъы, афтæмæй, йæ размæ нæ сæвæрдта нысан национ дзаумæттæ аразын, фæлæ йæ фæнды цæмæй æрмæст бакастæй дæр дзаумæттæ Ирыстоны конд кæй уыдысты, уый бæрæг дара.
Æрæджы базыдта проект «Alania Business Accelerator»-ы тыххæй, уый фæрцы æрыгæттæ бизнесы æмæ амалхъомады акæнынц ныфсджын къахдзæфтæ. Сфæнд кодта дзы бацархайын. Райста нæ бæстæйы раззагдæр экспертты амынддзиндзинæдтæ, цымыдисæй сын байхъуыста сæ лекцитæм.
Ныр «Alania Business Accelerator»-ы фæрцы Давид фидæны райсдзæн æххуыс-гранты хуызы. Уыимæ программæ æххæстгæнджытæ зæрдæ дарынц Давид ууыл кæй не`рлæуудзæн.
Ныридæгæн уал Давид йæ размæ сæвæрдта нысан æххæст æй кæндзæн гранты фæрцы. Фæнды йæ куыстуат фæуæрæхдæр кæнын, йæхицæн æххусгæнджытæ ссарын.
