Дзæуджыхъæуы фæндæгтæй бирæтыл хæдтулгæтыл нæ, фæлæ фистæгæй ацæуын дæр æнцон нæу. Хуыздæр уавæры не сты трамвайты фæндæнгтæн дæр. Æппæтуæрæсеон адæмон фронты уæнгтæ проект «Дорожная инспекция ОНФ»-ы фæлгæты бæрæг кæнынц фæндæгты уавæр. Æрæджы фронты архайджытæ федтой Дзæуджыхъæуы уынгты фæндæгтæ.
Нартовский уынджы цæрджытæ хъаст кæнынц сæ фæндаджы уавæрæй. Йæ цалцæгыл тох кæнынц ныр дыккæгæм аз. Сæ курдиатимæ бацыдысты дзуапдæттæг ведомствотæм дæр. Фарон сын ныфс бавæрдтой, фарста кæй аиуварс кæндзысты. Фæлæ сæм рад нæма æрхæццæ ис.
Цæрджыты курдиатмæ се ‘ргом раздæхтой Æппæтуæрæсеон адæмон фронты уæнгтæ. Сæ хъæппæрисмæ гæсгæ «Дорожная инспекция ОНФ»-ы фæлгæты сбæрæг кодтой фæндæгты уавæр. Проекты фæрцы раиртасынц горæты фæндæгтæй æвзæрдæр уавæры кæцытæ сты, уыдон.
Хуыздæр нæу сæ уавæр трамвайы фæндæгтæн дæр. Æвæстиатæй баивын хъæуы Чкаловы æмæ Николаевы номыл уынгты фæндæгтæ. Сæ бындур згъæлын райдыдта. Уыимæ ма нал бæззынц электрон хызæгтæ дæр. Цæмæй ног трамвайтæ æнæ къулымпыйæ цæуой, уый тыххæй ацы фарстатæ тагъд рæстæг хъæуы аиуварс кæнын.
Фæндæгты цалцæг цæрджыты иунæг фарста нæу. Сæ зæрдæ ма ‘хсайы тæссаг фæндæгты уаццæгтæ. Сæ иу Къостайы проспекты фæндаг. Цæрджыты хъуыдымæ гæсгæ дзы фистæгцæуджыты æдасдзинадæн хъæуы светофортæ сæвæрын. Уæд шофыртæ уыдзысты къæрцхъусдæр.
Кæд ныридæгæн цæрджыты фарстатæ иуварсгонд не сты, уæддæр сæ ныфс ис Æппæтуæрæсеон адæмон фронты архайды руаджы уавæр хуыздæры ‘рдæм кæй аивдзæн.
