Цæгат æмæ Хуссар Ирыстоны ‘хсæн санитарон авиацийы куысты иумæйаг фарстатыл æрдзырдтой сæрмагонд æмбырды. Разамынд ын лæвæрдта хицауады сæрдар Дзанайты Барис. Фембæлды райдиан премьер куыд фæнысан кодта, афтæмæй, санитарон авиацийы руаджы, медицинон æххуыс бакӕнынц Цæгат Ирыстоны цæрджытæн. Уый регионалон проект «Развитие первичной медико-санитарной помощи»-йы фæлгæты. Фæлæ æмбæлгæ æххуыс хъæуы Хуссар Ирыстоны дæр.
Дыууæ республикæйы ‘хсæн нысангонд æрцыд бадзырд. Документмæ гæсгæ сыхаг республикæйы цæрджытæ медицинон æххуыс исынц Цæгат Ирыстоны дзæбæхгæнæндæтты. Æвæстиаты уавæрты санитарон авиацийы æххуыс у ахсджиаг. Хуссар Ирыстоны æнæниздзинад хъахъхъæнынады æмæ социалон рæзты министр Наниты Сослан республикæйы хицауадæн загъта бузныг, Хуссар Ирыстоны æнæниздзинад хъахъхъæнынады къабазы фарстатæм йе ‘ргом кæй здахы, уый тыххæй. Кæронбæттæны Дзанайты Барис бабар кодта æппæт фарстатыл дæр лæмбынæгӕй бакусын.
