Уæдмæ та уал Цæгат Ирыстон райста коронавирусы ныхмæ ног вакцинæйы парти. «КовиВак», ахæм ном снысан кодтой уæрæсейаг ахуыргæндтæ, цы 3-аг вакцинайыл бакуыстой, уымæн. Æдæппæтæй республикæйы рынчындæттæ райстой 780 дозæйы.
Коронавирусы ног вакцинæ «КовиВак»-ы фыццаг парти райстой республикæйы рынчындæттæ. Куыд иннæ уæрæсейаг вакцинæйы хуызтæ, афтæ кæнгæ у дыууæ къæпхæнæй. Кæнын æй хъæуы фыццаг æмæ цыппæрдæсæм бон. 4-æм поликлиникæйы медицинон хо Абайты Зæлинæйы ныхæстæм гæсгæ, ног вакцинæйы сæйраг хицæндзинад у йæ дарыны фæткы.
Вакцинацийы райдианæй нырмæ 4-æм поликлиникæйы прививкæ скодтой 8 мин адæймаджы бæрц. Уыдоны ‘хсæн специалисттæ никæмæ бафиппæйдтой уæззау фæстиуджытæ. Æрмæст стæмтæн схизы сæ буары тæвд, æмæ чысыл рæстæг бæрæг фæдары уколы бынат. Фæлæ дохтыртæ куыд зæгъынц, афтæмæй уый тæссаг нæу. Низы ныхмæ привикæ скодта Дзæуджыхъæуы цæрæг Багаты Алик дæр.
Æрвылбон дæр ам вакцинаци цæуынц 20-æй 50 адæймаджы онг. Укол скæныны размæ та, æнæмæнг, у дохтыры æркаст. Нæй йæ кæнæн, йæ буары тæвд бæрзонд кæмæн у, ахæмтæн, сывæллæттæн, æнхъæлцау сылгоймæгтæн æмæ хъыгдард æнæниздзинадимæ адæмæн.
Абоны бон коронавирусы низ парахат кæныны ныхмæ вакцинаци у сæйраг мадзал. Дохтыртæ сидынц адæммæ, цæмæй сæхи æмæ сæ бинонты бахъахъхъæной, уый тыххæй скæной ацы хос.
