Фосы æмæ зæххы куыст кæнын, кæнæ мæргътæ дарын. Хъæууон хæдзарады къабазы чи фæллой кæны, уыдонæн паддзахадæй сæрмагонд æххуыс. Ныртæккæ йæм Мæздæджы районы æнхъæлмæ кæсынц 28 фермеры. Куыстуæттæй иу – Киевское хъæуы мæргъты фермæ. Раздæр уыд республикæйы егъаудæр хæдзарæдтæй иу. Ныр ногæй йæ райрæзтмæ æнтыстджын къахдзæфтæ кæны.
Хъæууон хæдзарады къабазы Мæздæг кæддæриддæр уыд раззагдæрты ‘хсæн. Фосы æмæ зæххы куыст кæнынæн районы ныр бирæ гæнæнтæ ис. Ам абон дæр уарзынц фæллой кæнын æмæ фидæнмæ æнтыстджын къахдзæфтæ кæнынц.
Киевское хъæуы цы мæргъты фермæ ис, уым алы бон дæр райдайы холлаг дæттынæй. Ам ис 300 хъазы «Линдæ», зæгъгæ, мыггагæй. Кусæг Вячеслав Рясой æппæт куыстытыл дæр иунæгæй æххæссы.
Раздæр-иу фермæйы хъазты æмæ бабызты нымæц хæццæ кодта 10 минмæ. Ныр дæр бынæттон цæрджытæ архайынц куыст сног кæныныл. Хæдзарады инкубаторты абон ис 45 мин айчы. Бæстон цæстдард — температурæмæ. Æппынæдзух 37 градусы æмæ 8 дæсæм хайы (37,8) хъуамæ уа. Æрмæстдæр уыцы домæн æххæстгæнгæйæ рауадздзæн инкубаторы хъазы цъиутæ. Фермер фæнд кæны грант райсын æмæ йæ хæдзарад фæуæрæхдæр кæнын.
Мæздæджы районы ныртæккæ фосы куыст парахат кæны. Фемерты ныхæстæм гæсгæ, хæдзарады райрæзтæн паддзахады æххуыс ахсджиаг у. Фæлæ грант райсыны фадат алкæмæн нæй. Зæгъæм, домæнтæм гæсгæ, фосы куыст чи кæны, уымæн хъуамæ уа хуымгæнды зæхх. Уый фæдыл сæмбæлынц зындзинæдтимæ. Æдæппæтæй районы гранты æххуысмæ æнхъæлмæ кæсынц 28 фермеры.
Ныртæккæ Мæздæджы районмæ ис ног фæндаг. Йæ фæрцы фермертæн бирæ фенцондæр сæ продукци Дзæуджыхъæумæ хæццæ кæнын. 2019-æм азæй федералон бюджетæй район исы субсидитæ хор æмæ халсарты куыстæн.
Афтæмæй Мæздæджы районæн ис бирæ гæнæнтæ хъæууон-хæдзарадон куыст кæнынæн. Цæрджытæ та зæрдæ дарынц, сæ район тагъд рæстæджы, кæддæрау, дæнцæгæн хæссинаг кæй уыдзæн, ууыл.
Дзæдзойты Фатимæ
