Цæгат Ирыстоны хъуамæ фæзына кæсæгты хуызты мыггаджы центр. Ууыл ныхас кодтой Уæрæсейы Федерацийы хъæууон хæдзарады министрады. Видеобастдзинады фæрцы æмбырды архайдта нæ республикæйы хицауады сæрдар Дзанайты Барис дæр.
Амынд центр саразыны хъæппæрис Уæрæсейы президент Владимир Путин йæ рæстæджы фехъусын кодта Сергей Меняйлоимæ фембæлды рæстæг. Ныр ныхас хъуамæ хъуыддагмæ рахиза. Дзанайты Барис æмбырды архайджытæм куыд радзырдта, афтæмæй центр саразынæн снысан кодтой пъланмæ гæсгæ куыстытæ. Бындур ын сæвæрдзысты иннæ аз, фæуыдзысты та 2025-æм азы. Ныр уал цыбыр æмгъуыдмæ хъуамæ бакусой проектон-хыгъдон гæххæттытæ бацæттæ кæныныл. Æдæппæтæй сын æхца бахъæудзæн 96 милуан сомы бæрц. Центр кæм сараздзысты, уыцы зæххы хай дæр снысан кодтой. Сбæлвырд ис, федералон хъомысад цы хъуыддæгтæн хъæуы, уый дæр.
Дзанайты Барис ма куыд загъта, афтæмæй ныртæккæ республикæйы рапарахат кæсаг дарыны сæрмагонд программæ. Ацы аз ыл хъуамæ бахардз кæной 70 милуан сомы. Уæрæсейы хъæууон хæдзарады министры хæдивæг Максим Увайдов куыд бафиппайдта, афтæмæй Цæгат Ирыстонæн кæсаг дарын хуыцауæй амынд у – йе `рдзон уавæртæ сты тæккæ хуыздæр иннæтимæ абаргæйæ. Уымæ гæсгæ, хъæууон хæдзарады ацы къабаз ахъаз уаид æгас республикæйæн дæр.
