Ног азы бæрæгбонмæ баззад цалдæр боны. Адæм сæхи бæстонæй цæттæ кæнынц. Бирæтæ бæрæгбоныл сæмбæлдзысты хæдзары, чидæртæ та рагацау бацагуырдтой рæсугъд æмæ цымыдисаг бынæттæ. Куыд фæнд кæнынц сæмбæлын Ног азыл Дзæуджыхъæуы цæрджытæ? Не сфæлдыстадон къордæн ныхасы бар.
Чуборевты бинонтæ ныр 5 азæй фылдæр цæрынц Ялтæйы. Фæлæ Ног азы бæрæгбоныл сæмбæлынц сæ ныййарджытимæ Цæгат Ирыстоны. Улæфæн бонтæ фæнд кæнынц арвитын нæ республикæйы хæхты.
Бирæтæн Цæгат Ирыстоны хæхты баулæфын ссис традици. Бирæтæ ацæуынц Куырттаты, Дæргъæвсы æмæ Цъæйы кæмттæм. Сыхаг регионтæй уазджыты нымæц азæй-азмæ рæзы.
Ног азыл кæм ис сæмбæлын, ахæм бынæттæ бирæ сты. Арæхдæр адæмы фæнды баулæфын январы фыццæгæм бонты. Ног азы æхсæв та арæхдæр æрвитынц хæдзары, бинонтимæ.
Æхсæвы 12 сахаты фæстæ та республикæйы цæрджытæ уарзынц хи ирхæфсын республикæйы сæйраг Заз бæласы раз. Уый тыххæй та адæмы æдасдзинадмæ сæ хъус дардзысты барадхъахъхъæнджытæ. Дзæуджыхъæуы Ленины номыл фæз сифтонг кæндзысты сæрмагонд кусæнгæрзтæй – æзгъæрагурæнтæй. Уымæй уæлдай ма январы фыццæгæм бонты кусдзысты театртæ. Зæгъæм, Вахтанговы номыл театр аивадуарзджытæн бацæттæ кодта спектакль «Конек-горбунок».
Куыд фæдзурынц «Ног азыл куыд сæмбæпай, афтæ йæ арвитдзынæ». 2020-æм азы къæсæрыл алчидæр йæхæдæг æвзары куыд хъæуы райдайын ног аз. Сæйрагдæр у, цæмæй уа рæсугъд æмæ зæрдæмæдзæугæ.
