Кæмæн нæ уыд афтæ. Æрбацыдтæ стоматологмæ хуымæтæг æркасты фæдыл æмæ уый раиртæста дæндæгтæн сæ фылдæр аразинаг кæй сты, уый. Дыууыназдзыд Мæдинæ ницæмæй хъаст кодта, фæлæ скодта компьютерон томографи. Дзæбæхгæнинаг кæцы дæндæгтæ сты, уыдон аразгæ интеллект равдисы сæрмагонд хуызы. Ног технологи ис Цæгат Ирыстоны медицинон академийы. Розæхуыз дзурæг у кариесыл. Бур та æвдисы мылыты низтæ. Урс амоны пломбæтæ куыд хорз æвæрд сты, уый. Пациентæн æмбарын кæнынц, ахæм уавæры хъуамæ куыд тагъддæр бавналай дæндæгтæ дзæбæх кæнынмæ.
Сæйрагдæр уый у, æмæ пациент уайтагъд раиртасы фæстиат кæнæн кæй нæй, уый. Уавæры тыххæй æрбацæуæгæн бамбарын кæнæн ис уæрæсейаг технологийы руаджы. Виртуалон æххуысгæнæг “Диагнокат”-ы бындурыл ис дыууæ гарзы. Компьютерон æркаст æмæ нейрохызтæ. Уыдон равдисынц тæссагдæр бынæттæ. Программæ диагноз нæ æвæры, уый æрмæст дæр баххах кæны патологи. Зондджын машинæ амоны цавæр хъæндзинадмæ хъæуы æргом аздахын, уый. Фæлæ кæронбæттæны хатдзæг хъуамæ скæна дохтыр.
Медицинон академийы стоматологон поликлиникæ Цæгат Кавказы паддзахадон кусæндæтты ‘хсæн у фыццаг, аразагæ интеллектæй кæм пайда кæнынц. Раздæр ахæм бæрзонд технологитæ уыд æрмæст хицæн клиникæтæ. Медицинæйы нымацон къабазы райрæзтмæ уæлдай æргом здахын профилон министрады раз сæвæрдта президент Владимир Путин.
Нæ бæстæйы конд ногдзинады руаджы дохтыр иртасдзын алы потологи дæр. Стоматологы виртуалон æххуысгæнæджы фæрцы тагъддæр цæуы имплантацийы процесс дæр. Ома дæндæгтæ титанæй конд конструкцитыл куы баивынц, уый. Сервис æххуыс кæны дæнцæг саразынмæ, уый дарддæр равдисы кæцы ран æмæ цас арф хъæуы æфсæры аразгæ уидаг ныффидар кæнын.
“Диагнокат” куыстуаты минæвæртты ныхæстæм гæсгæ, аразгæ интеллект фæнд кæнынц дарддæр парахат кæнын паддзахадон стоматологон клиникæты. Программæмæ хорз æххуыс уыдзæн дохтортæн.
