Волейбол, баскетбол, рог атлетикæ æмæ спорты æндæр хуызтæ. Беслæны райдыдта президентон спортивон хъæзтыты республикон къæпхæн. 100 скъоладзауы 4 боны дæргъы æвдисдзысты сæ цæттæдзинад. Архайджытæ ерыстæм сæхи цæттæ кодтой къорд рæстæг. Алы командæ дæр тырны æрмæст уæлахизмæ. Хуыздæртæ æарддæр сæ тыхтæ бавзардзысты æппæтуæрæсеон финалы.
Ацы æвзонг фæсивæд æрмæст уæлахизмæ тырнынц. Раст архайд æмæ сæ сæрæндзинад та сын уымæн хорз æххуыс сты. Дзуццаты Дана æмæ Бекъойты Дианæ ахуыр кæнынц скъола «Интеллект»-ы. Баскетболмæ се ‘ргом раздæхтой фæндзæм къласы. Уæд ацы спорты хуыз афтæ тынг фæцыд сæ зæрдæмæ æмæ ныртæккæ æнæ ацы хъазтæй чызджытæ сæ цард уынгæ дæр нæ кæнынц.
Дианæ æмæ Данæ тренеровкæ кæнынц къури 2-3 хатты. Уымæй уæлдай ма сын уæгъд рæстæг куы фæзыны, уæд æй æхсызгонæй сæ уарзон спорты хуызæн снысан кæынц. Сæ арæхстдзинады тыххæй бузныг сты сæ тренертæй: Мария Иванова æмæ Датиты Батразæй. Æмæ кæй зæгъын æй хъæуы физкультурæйы ахуыргæнджытæй: Хъыбызты Владимир æмæ Денис Шалковниковæй. Ахуыргæнджытæ чызджытæй разы сты.
Æппæтуæрæсеон «Президентон спортивон хъæзтыты» регионалон къæпхæн цæудзæн цыппар боны. Скъоладзаутæ ерыс кæнынц цалдæр хуызы. Се ‘хсæн баскетбол, волейбол, рог атлетикæ, теннис, спортивон туризм æмæ æндæртæ. Турниры архайдтой Бæрæгъуыны, Беслæны, Змейкæйы, Камбилеевскское æмæ Дзæуджыхъæуы командæтæ. Алы къорды дæр æхсæз лæппуйы æмæ æхсæз чызджы.
Республикон къæпхæны раззагдæртæ райсдзысты кубоктæ æмæ майдантæ, хуыздæр командæ дарддæр архайдзæн регионты ‘хсæн ерысты.
