Æппæт санитарон домæнтæ хынцгæйæ Цæгат Ирыстоны сбæрæг кодтой Дзæуджыхъæуы бон. Горæты равзæрдыл сæххæст 236 азы. Бæрæгбоныл республикæйы цæрджытæ сæмбæлдысты цигæнгæйæ, кафгæ æмæ заргæ. Терчыбылгæрон сарæзтой хъазт, уыди дзы ирон чиъириты фестиваль, алыхуызон спортивон ерыстæ æмæ концерт. Бæрæгбоны мадзæлтты архайдта Цæгат Ирыстоны сæргълæууæг Битарты Вячеслав.
Чызджытæ цӕттӕ кӕнынц чъириты хыссæ. Уайтагъд иннӕтӕ сæ фарсмæ пецæй исынц цæттæ чъиритæ. Цалдæр минуты фæстæ бæрæгбоны уазджыты бон у уыдонӕй тæвдæй акомдзаг кæнын. Нациналон традицион хæринаг кæнынц уыцы иу рæстæг цалдæр площадкæйы. Цыхт, картоф, дзидза, фæткъуытӕ. Алы хуызы хӕринаг дæр дзы фенæн уыд. Фестивалы архайджытæ удуæлдайæ кусынц, цæмæй адæмы зæрдæтæ барæвдауой.
Бæрæгбоны фӕдыл Терчы былгæрон сарæзтой алыхуызон тематикон фæзтæ. Уазджыты бон сси алы нациты хæринæгтæй дæр фенын. Узбекистан, Таджикистан, Азербайджан, Греци. Сæ продукци равæрдтой бынæттон куыстуæттæ дæр. Дзидза æмæ къалбæстæ. Бæрæгбон сбастой фæззыгон тыллæгимæ. Суанг ма дзы къамтæ исынæн бынæттæ дæр уымæ гæсгæ рахицӕн кодтой. Рауад зæрдæмæдзæугæ, куыд хистæртæн, афтæ гыццыл уазджытæн дæр.
Уазджытæн ма равдыстой, ирон кæлмæрзæн куыд бийын хъæуы, стæй йыл нывæфтыд куыд аразæн ис, уый. Сæ куыстытæ равдыстой æрмдæснытæ. Къуымбилæй кӕнынц дзауматæ. Фæзты ‘хсæн ис хæрзаудæн дæр. Цыдæриддӕр сӕм фæрæзтæй бæрæгбоны рӕстӕг ӕгбафта, уыдон ратдзысты Бæдойты Заринæйы фондмæ.
Гыццыл джигиттæ сæхи бафæлвæрдтой нæртон тохы. Сæ фарсмæ та – национ кæфтыты уарзджытæ æвдисынц сæ дæсныйад.
Бæрæгбоны æппæт уазджытæн дæр сæ буары тæвд сбарстой. Се ‘ппæтæн дæр фæзмæ бахизæны радтой маскæтæ. Эпидемиологон уавæр ныртæккæ хуыздæртæй нæу. Фæлæ уæддæр, санитарон домæнтæ хынцгæйæ, республикæйы цæрджытæ бæрæгбоныл бацин кæнынмæ æрбамбырд сты.
Бæрæгбоны фæзтæ бабæрæг кодта республикæйы сæргълæууæг Битарты Вячеслав. Базонгæ хъæууон-хæдзарадон продукциимæ. Федта национ æхсæнæдты фæзтæ. Сæ минæвæрттæ сæргълæууæгæн бузныджы ныхæстæ ракодтой, республикӕйы сӕм хорз цæстæй кæй кæсынц æмæ сын кæддæриддæр баххуыс кæнынмæ цæттæ кæй сты, уый тыххӕй.
Дыккаг аз бæрæгбоны программæйы уыдис футболæй турнир сывæллæтты спортивон скъолаты ‘хсæн. Клуб «Алани»-йы кубокыл тох кодтой 4 командæйы. Уæлахиздзаутæ хæрзиуджытæ райстой Битарты Вячеславы къухтæй. Ацы аз бæрæгбоны программæмæ бахастой ивддзинæдтæ. Площадкæты нымæц зынгæ фæкъаддæр. Фæлæ, уæддæр бæрæгбон рауад ирд æмæ зæрдæмæдзæугæ. Арфæйы ныхæстæ республикæйы цæрджытæн ракодта республикæйы сæргълæууæг дæр.
Бæрæгбон кæд кæронмæ æрхæццæ, уæддæр ма адæмы удты йæ рæсугъд хуыз бирæ рæстæг уыдзæн.
