Цæгат Ирыстоны Сырх чиныгыл кæронмæ бакуыстой. Архайдтой йыл Цæгат Ирыстоны паддзахадон университеты 25 иртасæджы æмæ специалисты. Бæрæг кодтой, стæм чи у, ахæм зайæгойты æмæ сырдты хуызтæ. Семæ иумæ архайдтой республикæйы æрдзон фæдзæхст бынат æмæ национ парк «Алани»-йы кусджытæ.
Сырх чиныджы ног рауагъды ис 490 сырды хуызы, бахъахъхъæнын кæй хъæуы, ахæмтæ. Чиныджы цы бæрæггæнæнтæ фыст æрцыд, уыдонмæ гæсгæ архайынц сæрмагонд мадзæлттæ саразыныл, цæмæй æрдзы уавæр фæхуыздæр уа, уый тыххæй. Чиныджы презентаци Цæгат Ирыстоны паддзахадон университет сараздзæн Экологи æмæ æрдзон ресурсты министрадимæ иумæ.
Уæ зæрдыл уын æрлæууын кæндзыстæм, фыццаг Сырх чиныг республикæйы сарæзтой 1981-æм азы. Уый фæстæ ма йыл бакуыстой æмæ 1999-æм азы рацыд ноггонд Сырх чиныг.
