Æхсæнадон бынæтты санитарон домæнтæ куыд æххæст кæнынц, уымæ Уæрæсейы фæлхасгæнджытæм цæстдарды управленийы специалисттæ cæ хъус бæстонæй дарынц. Бæрæг кæнынц базарадон объекттæ æмæ æхсæнадон хæрæндæттæ. Ацы хатт араст сты Мæздæджы районмæ. Домæнтæ сты хуымæтæг — маскæ дарын, дезинфекци кæнын æмæ социалон дистанци æххæст кæнын.
Ковид-пациентты куы фæрсай, коронавирусæй кæм фæрынчын дæ, зæгъгæ, уæд арæхдæр ранымайынц базарадон объекттæ. Уый фæдыл специалисттæ, фыццаджыдæр, сæ хъус дарынц санитарон домæнтæм. Маскæтæ æмæ дезинфектор алы егъау дуканийы дæр æнæмæнг хъуамæ уой. Уымæй уæлдай, уæлдæф сыгъдæггæнæн гарз дæр.
Фæлхасгæнджытæм цæстдарды управленийы амынддзинæдтæ Мæздæджы дуканиты æххæст кæнынц. Уавæр хынцгæйæ, æндæр гæнæн дæр нæй. Уæвгæ, фæткхалджытæн, низæй уæлдай, иварæй дæр тæссаг у. Амалхъом адæймагæн — 150 мин сомы онг, юридикон бæрнондзинад кæмæ ис, уый та бафиддзæн 500 мин сомы онг. Закъоны сæрты дыккаг хатт си ахизы, уымæн йæ объект сæхгæнынц. Ацы дуканийы администратор Жаннæ куыд зæгъы, афтæмæй домæнтæ карз сты, фæлæ хъæугæ.
Жанна Ким, дуканийы директор:
«Домæнтыл сахуыр стæм. Пандемийæ ныр афæдзæй фылдæр хæссы. Маскæ скæн, зæгъгæ, куы фæзæгъæм адæмæн, уæд вæййы æмæ сæ хызынтæ дæр фæстæмæ æрæвæрынц æмæ ницыуал балхæнынц. Уæдæ рейдтæ дæр арæх вæййы. Специалисттæ адæмимæ ныхас кæнынц. Иу хатт кæй фæивар кæнынц, уыдон дыккаг хатт фæтк нал халынц».
Инспектортæ ахæм рейдты æрвылбон рацæуынц. Дуканитæй уæлдай сæ хъус дарынц æхсæнадон хæрæндæттæм. Ам дæр кусджытæм ис æнæмæнг домæнтæ. Æрбацæуджыты æдасдзинад хынцгæйæ, маскæ дарын æмæ санитайзерæй пайда кæнын у æнæмæнг.
Виктория Говорухина, рестораны администратор,
«Райсомæй, куысты размæ, скæнæм дезинфекци, уæлдæф ссыгъдæг кæнæм. Дарддæр нæ тæвд сбарæм. Адæмы æрмæст уый фæстæ æрбауадзæм».
Æмæ кæд цæрджытæн сæ фылдæр санитарон домæнтæ æххæст кæнынц, уæддæр фæткхалджытæ дæр разыны. Фæлхасгæнджытæм цæстдарды управленийы раз ис бæрнон хæс. Адæмæн бамбарын кæнын, æнæниздзинад æмæ цард бахъахъхъæнынæн санитарон домæнтæ куыд ахсджиаг сты, уый.
Зоя Кулибаба, Уæрæсейы фæлхасгæнджытæм цæстдарды Управленийы хайады разамонæджы хæдивæг:
«Амынддзинæтæм æппынæдзух ивддзинæдтæ хаст æрцæуы. Мах уыцы хъусынгæнинаг æвæстиатæй адæммæ бахæццæ кæнæм. Ныртæккæ бæрæг кæнæм æппæт æхсæнадон бынæттæ. Се ‘хсæн куыд базарадон объекттæ æмæ æхсæнадон хæрæндæттæ, афтæ афтектæ æмæ медицинон уагдæттæ дæр. Уæлдай æргом здæхт цæуы скъолатæ æмæ сывæллæтты рæвдауæндæттæм. Уæлдæф сыгдæггæнæн гарз алы объекты дæр æнæмæнгæй хъуамæ уа».
Ныртæккæ Мæздæджы коронавирусæй дзæбæх кæнынц 21 адæймаджы. Ковид-пациенттæн та рынчындоны ис æрмæст 60 бынаты. Уый фæдыл специалисттæ сидынц æдасдзинады домæнтæ æххæст кæнын. Дарын маскæ æмæ адæм бирæгæйттæй кæм æмбырд кæнынц, уырдæм, гæнæн уæвгæйæ, ма цæуын. Цард бахъахъхъæнынæн уый ахсджиаг у.
Дзæдзойты Фатимæ
