Уæрæсейы райдыдта «Бæллицты заз бæлас»-ы юбилейон акци. Уый тыххæй фехъусын кодтой президенты платформæ «Россия – страна возможностей», «Росмолодёжь» æмæ бархионты змæлд «Мы вместе»-йы минæвæрттæ. Бацархайын дзы сæ бон у, царды зын уавæрты чи бахауд, уыцы сывæллæттæ æмæ карджын адæмæн. Уый тыххæй хъæуы 10-æм ноябрæй 10-æм декабры онг сæрмагонд сайты бадæттын курдиат. Лæвæрттæ та кæндзысты 2023-æм азы 28-æм февралы онг.
Ацы хатт акци «Бæллицты заз бæлас»-ы бацархайæн уыдзæн, не ‘мбæстæгтæй фæсарæнты чи ис, уыдонæн дæр. Акцитæ ма ацæудзысты «Россотрудничество»-йы уагдæтты. Курдиат бадæттæн ис сæрмагонд æфсæддон операцийы архайджытæй чи фæцæф, кæнæ æбæрæгæй чи фесæфт, уыдоны сывæллæтты фæдыл дæр.
Уæ зæрдыл уын æрлæууын кæндзыстæм, акцийы бацархайын сæ бон у, 3 азæй 17 азы онг сывæллæттæн, стæй 60 азæй фылдæр кæуыл цæуы, æмæ йе`нæниздзинад хъыгдæрд кæмæн у, уыимæ йе ‘фтиæгтæ цæрынæн æппынкъаддæры бæрцæй кæмæн сты, уыдонæн.
Æрвылаз дæр сывæллæтты æмæ хистæр кары адæмы бæллицтæ æххæст кæнынц политиктæ, амалхъом адæм, хицауады уæнгтæ, ахуырады, аивады æмæ спорты минæвæрттæ. Æдæппæтæй дзы 2018 азæй нырмæ бацархайдтой 42 мин хæрзгæнæджы æмæ 200 куыстуаты. Уæдæ лæвæртты иумæйаг аргъ та сси 700 млн сомæй фылдæр.
