Иван Тургенев, Владимир Высоцкий, Марина Якина æмæ æндæр зындгонд авторты радзырдтæ, уыимæ монологтæ. Реуазты Данæ адæмы размæ рахаста сæрмагонд моноспектакль. Æрыгон аив дзырды дæсны йæ педагогимæ бакодтой æнтыстджын куыст. Премьерæ бабæрæг кодта не сфæлдыстадон къорд дæр.
Уырнгæ дæр нæ кæны ацы чызгыл 10 азы йедтæмæ нæ цæуы, уый. Сценӕйы æвзонг дæсныйæн уайы адæмы йæхимæ æрхъусын кæнын, лæмбынæг ын кæсынц йæ алы фезмæлдмæ дæр. Реуазты Данæйы курдиат аивадуарзджытæ сæ зæрдæтæм хæстæг айстой. Сæ къухæмдзæгъд ын нæ бавгъау кæнынц.
Прогаммæйыл Данæ бакуыста йæ ахуыргæнæг театр æмæ кинойы артисткæ Марина Тихомироваимæ. Цæры æмæ кусы Мæскуыйы. Данæимæ æмгуыст кæнынц æртæ азæй фылдæр. Ацы концертмæ сæхи цæттæ кодтой афæдзы ‘рдæг онлайн хуызы, уырыссаг театры та сын уыд æрмæст иу репетици. Моноспектакль «Раз, два, три, четыре, пять, я иду себя искать» рауад æнтыстджын.
Дунеон классикæйы уацмыстæ æмæ ныры дуджы автортæ. Спектакль «Космос»-ы концепци хуымæтæджы нæ равзæрстой. Стъалытæ адæймаджы разæнгард кæнынц размæ цæуын хуыздæр бæллицтыл хъуыды кæнын, зæгъы æрыгон артисткæ. Уымæ гæсгæ йæ фæнды адæймаджы зæрдæйы хуыздæр æнкъарæнтæ æмæ фæндтæ гуырын кæнын.
Моноспектакль у стыр æнтыст. Сценæ йæхимæ ӕлвасы. Фидæны Данæйы фæнды Стыр театры сценæмæ рацæуын æмæ киноты хъазын. Сæйрагдæр та у – æргом уæвын æмæ ног бæрзæндтæм хизын.
