Афæдзы вазыгджындæр цаутæй иу – Владимир Путин ныртæккæ дзуры ацы азы хатдзæгтыл комкоммæ эфиры. Трансляци райдыдта 12 сахатыл. Нæ телеканалы сфæлдыстадон къорд дæр кусы бынаты. Фæбæрæг кæндзыстæм уый, æмæ фæрстытæ президентмæ исын райдыдтой дыууæ къуырийы размæ.
Бадзурынæй уæлдай ма, кæй фæндыд, уыдонæн фадат уыд хъусынгæнинаг арвитын интернет-сайтмæ, кæнæ та социалон хызæгтæ æмæ мобилон уæлæфтуанты уылты. Дзургæ чи ‘рбакодта, æрмæст уыдоны нымæц ахызт милуанæй. 400 минмæ схæццæ сты хъусынгæнинæгтæ, уæдæ интернет сайтмæ фарстатæ æмæ курдиаттæ чи рбарвыста, уыдон та – 105 мины. Уыцы куыст иу минут дæр нæ баурæдта.
Владимир Путин ныр сахаты бæрц дзуæппытæ дæтты нæ бæстæйы цæрджыты цы фарстатæ тыхсын кæны, уыдонæн. Фыццаджыдæр – сæрмагонд æфсæддон операци. Уырдæм бархионæй чи ацыд, уыдонæн æххуысы тыххæй уыд цæгатирыстойнаг уацхæссæджы фарст. Владимир Путин куыд загъта, афтæмæй сæрмагонд æфсæддон операцийы æппæт архайджытæн, сæ хыгъды бархионтæ дæр, хъуамæ уа æмхуызон уавæртæ. Фæнысан кодта, нæ батальонтæ “Алания” æмæ “Шторм. Осетия”-йы хъæбатырдзинæдтæ æмæ сгуыхтдзинæдты тыххæй бæлвырд кæй зоны. Ныры онг ма ныхас цыд мызды бæрцыл. Президенты ныхасмæ гæсгæ, сырæзт 8%. Æгуыст цæрджыты нымæц та фæкъаддæр 2,9%-ы онг.
