Дунеон чемпион боксæй профессионалты ‘хсæн IBF æмæ WBA верситæм гæсгæ Гаситы Мурат фембæлд абон журналисттимæ. Боны фæткы уыд алыхуызон фарстатæ. Уæлахизы фæстæ Муратмæ цы æнкъарæнтæ уыд, куыд цæттæ кæны йæхи финалмæ, цавæр хæстæ сæвæры хæсты размæ. Спортсмены ныхæстæм гæсгæ, йе ‘стырдæр ныфс йæ бинонтæ сты – йæ мад æмæ йæ хистæр фсымæр. Разæнгард дæр æй уыдон кæнынц. Журналистты ма фæндыд базонын, финалы кæимæ фембæлдзæн – Александр Усикæй тæрсы æви нæ æмæ йæм йæхи куыд цæттæ кæны, уый. Ирыстойнаг боксер загъта, нырма йæ бинонтимæ кæй улæфы, дарддæр та йæхи цæттæ кæнынмæ ацæудзæн Калифорнимæ. Уым тренировкæ кæны 3 азы дæргъы. Александр Усикæй нæ тæрсы, рагæй йын кæсы йæ тохтæм. Спарингтæ кæндзæн уый хуызæн чи хæцы, ахæм боксеримæ. Мураты уырны, кæй йыл фæуæлахиз уыдзæн, уый. Уæ зæрдыл уын æрлæууын кæндзыстæм, финал 11-æм майы кæй ацæудзæн Саудовски Аравийы. Бынатæн ма йæ бон аивæн у. Мураты командæ æмæ Уæрæсейы боксы федерацийы фæнды чемпионат нæхи бæстæйы саразын.
Мураты ма афарстой, Юниер Дортикосæн йæ чемпионы ронбаст цæмæн радта, зæгъгæ. Интернеты хыз уыцы цау рафыцын кодта. Мураты ныхæстæм гæсгæ, вазыгджындæр ын у, кæй рамбылдта, уый. Пресс-конференцийы ма æрныхас кодтой, боксеры фидæны пълæнттыл. Мураты фæнд кæны æппæты стырдæр уæзы хæцын, фæлæ уал ныртæккæ йæ хъуыдытæ баст сты æрмæстдæр финалимæ. Фембæлды ма архайдта нæ республикæйы физкультурæ æмæ спорты министр Бæройты Хасан. Йæ ныхæстæм гæсгæ, ацы уæлахиз нæ адæмы баиу кодта.
