Тематикон экспозицитæ æвдисынц æфсæнвæндæгты истори. Федтой сæ Дзæуджыхъæуы цæрджытæ дæр. Нæ республикæмæ æрцыд поезд-музей. Ис дзы 12 вагоны. 17 азы Уæрæсейы горæттыл цæуы æмæ адæмы цымыдис кæны. Куыд цæгатирыстойнæгты, афтæ нæ уацхæсджыты дæр. Бæлвырддæр хабæрттæ – се `рмæджы.
Ацы поезд йæ бынатæй нæ фезмæлдзæн, афтæмæй адæймаджы дард балцмæ араст кæндзæн. Алы вагоны дæр – хицæн экспозици. Фыццаг паровозты макетæй райдай æмæ тагъдцæуæг локомотивæй фæу. Æфсæнвæндаг станцæтæ æмæ фæндаджы сæрты ахизæнтæ. Æвдисынц нырыккон проекттæ æмæ технологитæ.
«Ам нæм ис электричкæтæ, электропоездтæ, бæлцæттæмцæстдарджытæн дыууæ уæладзыгон вагæттæ, ис ма дзы сæрмагонд машинæтæ дæр – уый дын æфсæнвæндаг аразæг – локомотивтæ æмæ Камазтæ. Ацы 3 стыр локомотивы та Уæрæсейы сты се ппæтæй цырддæр. Хъармæй кусæг, электрон тыхæй æмæ турболасджытæ. Фæстаг экспонат егъау у. Балæвар нын æй кодта Мæскуыйы метрополитен 2015 азы. Не 80 азы юбилеймæ», — бæлццæттæм цæстдарæг Александр Степанов.
Ай та у фидæны машинисттæн сæ тренажер. Поезды халдих раст. 3D кæй хонынц, ахæм графикæимæ. Ис дзы равзарæн алыхуызон боныхъæды уавæртæ дæр. Ахæм гæрзтыл кусджытæ фæлварæныц сæ арæхстдзинад, сæхи ахуыр кæнынц. Фæлварæнты сæрты æнтысджынæй чи ахиза, æрмæстдæр уыдонæн ратдзысты бар æцæг поездыл тæрынæн.
«Фыццаг тренажерæн йæ ном у электропоезд Ласточка-Дезирæ С-1. Мæнæ æцæг поезд куыддæриддæр у, афтæ ай дæр ифтонггонд у. Иннæ тренажер – локомобиль Камаз, зæгъгæ. Ай та хъæуы, æфсæнвæдæгтыл цы куыстытæ фæцæуынц, уый бацамона. Зæгъæм, митхафæн куыстытæ. Фæстаг экспонат – машинисты бынат ИП1М», — бæлццæттæм цæстдарæг Александр Степанов.
Иу вагоны æвдисынц, Фыдыбæстæйы Стыр хæсты рæстæг цы уавæртæ уыд, уый. Судзы арт, æфсæддонты дзаумæттæ. Ахæм æмæ æндæр цымыдисаг экспозитæ ацы поезды бирæ ис. Дзæуджыхъæумæ æрцыд æрмæстдæр иу бонмæ. Уæдмæ йæ бирæ уазджытæ бабæрæг кодтой. Ныййарджытæ æрбакодтой сæ сывæллæтты. Ахуыргæнæндæтты разамонджытæ – сæ студентты.
«Æз ардæм æрбацыдтæн мæ къордимæ. Фæнды мæ мæ ахуыргæнæгимæ исты ногдзинæдтæ базонын. Æз дæр ахæм дæсныйад равзæрстон æмæ хъуамæ йæ сусæндзинæдтæ иууылдæр мæ къухы уой», — æфсæнвæндаджы техникумы студенткæ Наниты Екатеринæ.
Æсæнвæндаджы музей байгом кодтой 2011 азы. Уæдæй нырмæ Уæрæсейы алы къуымты æрзылди. Экспозицитæ алы бон дæр сног кæнынц, уый тыххæй æмæ æрбацæуджыты алцыдæр цымыдис кæны.
Гогаты Марат
