Горæт аразыны политикæйы муниципалон æмæ республикон хицаудзинады ахастдзинæдтæ иуæй-иу хъуыддæгты чи бæлвырд кæны, уыцы закъон ист æрцыд. Ныр уыдон хаудзысты, комкоммæ республикæйы сæргълæууæгæн дзуапп чи дæтдзæн, архитектурæ æмæ горæт аразыны уыцы комитетмæ. Ахæм уынаффæ рахастой Цæгат Ирыстоны парламенты æмбырды. Комитетæн йæ бон уыдзæн сæрмагонд цæстдард кæнын. Йæ куыстмæ йын кæсдзæн нæ республикæйы сæргълæууæг Битарты Вячеслав. Закъоны проект депутатты размæ рахаста Цæгат Ирыстоны администрадцийы разамонæджы фыццаг хæдивæг Ортобайты Виктор. Ног комитет администрацийæн йæ куыст йæ бæсты нæ кæндзæн. Æххæстгæнæн бартæ кæмæ ис, уыдон сæ бынæтты баззайдзысты. Ног арæзтадæн разыйы гæххæтытæ раттын уыдзæн уыцы комитеты бæрны. Депутаттæ закъоны проекттæй разыйæ баззадысты.
Фæлæ дзы закъоны проектимæ чи не сразы ис ахæмтæ дæр разынд. Парламенты депутат Елдзарты Медеа ныхæстæм гæсгæ, бынæттон хиуынафæйады управленийы сæ бартæй ссæрибар кæнæн нæй.
Республикæйы закъон, федералон закъонимæ куыд баст у, уымæн дзуапп радта Ортобайты Виктор. Йæ ныхæстæм гæсгæ иннæ регионты ахæм ивддзинæдтæ раздæр æрцыдысты.
Ныхасы бар ма раттой промышленность æмæ транспорты министр Хайдарбек Бутовæн дæр. Республикæйы цæрджыты хъæстытæ сарæх сты. Æхсæнадон транспорт къуылымпытимæ кæй цæуы, уый тыххæй. Ныртæккæ республикæйы æдæппæтæй 178 маршруты цæуы. Уыдонæй æрмæст 8 кусы æнæ фиппайнæгтæй.
