Наркотиктæй пайда кæнынц, æви нæ, уый сбæрæг кæнынæн иртæстытæ чи нæма радта, уыцы иугонд спортивон командæтæ æнæ хцайы фæрæзтæй баззайдзысты. Уый тыххæй абон фехъусын кодта Цæгат Ирыстоны сæргълæууæг Битарты Вячеслав наркотикты ныхмæ тохгæнæн къамисы æмбырды.
Ахæм хæс æвæрд æрцыд Цæгат Ирыстоны физкультурæ æмæ спорты министрады къамисы размæ ивгъуыд æмбырды. Профилон уагдоны ног разамонæг Гæбулты Владимир зæрдæ бавæрдта, уыцы куыст азы кæронмæ кæй фæуыдзысты, уымæй. Æмбырды æрныхас кодтой наркотикты ныхмæ профилактикон куыст – скъоладзаутæ æмæ студенттæн аразыны, оперативон-профилактикон мадзал “МАК-2018”-ы хатдзæгтæ æмæ наркотиктæ цы зайæгойты ис, уыдон ныццæгъдыны тыххæй. Профилон министрадтæ уыцы куысты тыххæй сарæзтой докладтæ. Физкультурæ æмæ спорты, стæй ахуырад æмæ наукæйы министрадтæн бабар кодтой æнæниз царды уаг парахат кæныныл æмæ æрыгæттæм раст хъуыдытæ рæзын кæныныл æнтыстджындæрæй бакусын.
Æмбырды ма байхъуыстой Цæгат Ирыстоны фæсивæды хъуыддæгты фæдыл комитет æмæ Фæсивæдон парламент цавæр профилактикон куыст кæнынц æрыгæттимæ æмæ цы æххуыс сты афтекон наркоманиимæ тохы. Республикæйы сæргълæууæг басидт, наркотикты ныхмæ куысты профилон уагдæттæ, æхсæнадон организацитæ, фæсивæды социализацийы центртæ, национ-культурон æхсæнадтæ, Алайнаг хъазахъхъаг æфсад æмгуыст куыд кæной, уымæ.
