Национ проект «Культура»-йы æххуысæй бындуронæй сцалцæг кодтой Алагиры аивæдты скъола. Ноггонд æрцыд куыд бæстыхай, афтæ йæ материалон-техникон бындур дæр. Ныр сывæллæттæн сæ курдиат раргом кæнынæн фæзынд фылдæр гæнæнтæ. Ныридæгæн дзы архайы 300 сабийæ фылдæр.
Дзобайты Алинæ, музыкалон инструментыл цæгъдгæйæ, йæ алыварс ницыуал фæуыны. Фортепьянойы уæлхъус куы ‘рбады, уæд йæ хъуыдытæ æмæ зæрдæйы ахаст фæхуыздæр вæййынц. Сæйрагдæр та — йæхи хоны амондджын. Куыд зæгъы, афтæмæй, музыкæ йæ царды ахсджиаг бынат суанг сабибонтӕй фӕстӕмӕ бацахста. Аивæдты скъоламæ æрбацæуы æрвылбон.
Аивадыл иузæрдион чи у, ахæм сывæллæттæ скъолайы ис 300. Архайынц 4 здæхтмӕ гӕсгӕ: адæмон, фортепьяно, нывкæнынад æмæ хореографи. Семæ кусынц 32 фæлтæрдджын ахуыргæнæджы. Ахуыргæнæн уагдоныл ныр 60 азæй фылдæр цæуы. Уыцы рæстæгмæ аивады цымыдисаг дунемæ рауагъта цалдӕр сæдæ курдитджын адæймаджы. Ныртæккæ ахуыр кæнынц нæ бæстæйы раззагдæр профилон уагдæтты, сæ аивад адæмы размæ хæссынц сценæйæ.
Дыууæ азы размæ ам райдыдтой бындурон цалцæггæнæн куыстытæ. Раивтой бæстыхайы сæр, пъол, инженерон коммуникацитæ иууылдæр. Сног кодтой хъармгæнæн системæ ӕмӕ дзы ныр фæзынд дыууæ ног агдоны. Техникон æгъдауæй нырыккон домæнтæн дзуапп дæтты уагдон.
Скъолайы хъомылгæнинæгтыл цæуы 7 азæй 17 азы онг. Ахуыртæ дзы цæуынц алы бон дæр фæсурокты. Хи бафыссыны тыххæй хъæуы æрмæст курдиат ныффыссын æмæ исæн къамис ацæуын.
