Беслæны фылдæр хайы дарддæр ивынц доны æмæ канализацион хæттæлтæ. Куыстытæ цæуынц «Цæрджытæн æнцонвадат цæрæнхæдзæрттæ æмæ коммуналон лæггæдтæ аразыны» программæйы фæлгæты. Бынæттон цæрджытæ цалцæггæнæн куыстытæй сты разы.
Цалдæр боны фæстæ ам кæронмæ фӕуыдзæн канализацион хæтæлты рацарæзт. Уый та ууыл дзурæг у, æмæ бынæттон цæрджытæ къорд æзты цы къуылымпыдзинæдтимæ æмбæлыдысты, уыдон ферох кæнæн уыдзæн. Сæ ныхæстæм гæсгæ, къæвда бон-иу Сталины номыл уынг арæх доны бын фæци. Куыстытæм бавналынц райсомæй.
Кусджыты ныхæстæм гæсгæ, æппæт æрмæджытæ дæр сты хæрзхъæд — æнусы æмбисæй къаддæр хъуамæ ма фæлæууой. Ныртæккæ сæххæст кодтой куыстыты 80 процент.
Уæзласæн хæдтулгæтæ æмæ фæндагаразæн техникæйы хъæр, кæй зæгъын æй хъæуы, се ‘хсызгонтæй нæу. Фæлæ цæрджытæ уавæр æмбарынц. Специалисттæ дæр архайынц цалцæджы цыд бæстонæй рацаразыныл. Фæндаг къахынц хайгай, цæмæй хæдтулгæты цыд дæр ма къылымпы кæна.
Егъау реконструкци цæуы «Цæрджытæн æнцонвадат æмæ комунналон лæггæттæ аразыны» фæлгæты. Беслæны уынгтӕн сӕ фылдæр хайы ивынц дондзæуæн, уыимæ канализацион хæтæлтæ. Æдæппæтæй ацы нысæнттæн рахай кодтой 2,5 млрд сомы бæрц. Нысангонд графикмæ гæсгæ цалцæг кæронмæ сæххæст кæнын фæнд кæнынц иннæ аз декабры кæрон.
