Уæрæсейы президенты æххæстбарджын минæвар Цæгат Кавказы федералон зылды Олег БелАвенцев куыстадон балцы уæвгæйæ бабæрæг кодта Цæгат Ирыстоны вазыгджын социалон объекттæ. Сæйраг æргом аздæхта медицинæимæ баст бæстыхæйтты куыстмæ. Ууыл йæ балц нæ фæци.
Фыццаджыдæр Олег БелАвенцев бабæрæг кодта Рахизфарсы районы сæйраг рынчындон. Йæ бæстыхæйттæй иуы ныртæккæ цæуы бындурон рацарæзт. Æнæниздзинад хъахъхъæны министр Михаил Ратмановы ныхæстæм гæсгæ уым фæнд кæнынц реанимацион, хирургион æмæ сывæллæтты хайæдтæ саразын. Нырма уал рынчынты дзæбæх кæнынц æндæр бæстыхайы. Цалцæггæнæн куыстытæн æхцайы фæрæзтæ радих кодтой Уæрæсейы Президенты уæлæмхасæн фондæй. 17 милуан сомæй фылдæр фæхай кодтой Беслæны дзæбæхгæнæндоны рацарæзтæн. Ахæм куыстытæ ма цæуынц Алагиры рынчындоны дæр. Олег БелАвенцевæн куыд радзырдтой, афтæмæй бæстыхай заууатмæ `рцыд æмæ йæ банывыл кæнынмæ фæстиатгæнæн нæ уыд. Агъуыстытæ нырыккон домæнтæн дзуапп нæ лæвæрдтой, уыимæ зынгсирвæзтыты ныхмæ мадзæлттæм дæр хъæугæ фæкаст нæ уыд. Уымæн æвдисæн уыдысты, палатæтæ цы уавæры уыдысты, уыцы къамты нывтæ.
Олег Белавенцевæн радзырдтой, республикæ 5 азы размæ цы кусæнгæрзтæ райста, уымæй ныртæккæ рынчындæттæ кæй ифтонг кæнынц. Ног министры æрбацыды размæ уыцы медтехникæ хæлуарæджы тынты бын фæци. Æххæстбарджын минæвар хъуыддаг бæлвырдæй раиртасын барадхъахъхъæнæн оргæнтæн бабар кодта. Дарддæр уазджытæ сæ фæндаг ракодтой сывæллæтты клиникон рынчындоныл. Бæлвырддæр та – рынчындоны хæцгæ низты хайадыл. Байгом æй кодтой ацы аз февралы. Уыйразмæ йæ 30 азы кодтой цалцæг. Белавенцев йе `ргом аздæхта куыстыты хæрзхъæддзинадмæ. Æркаст уавæртæм, уæлдайдæр сывæллæттæн арæзт, стæй кусæнгæрзтæй ифтонгадмæ. Олег Белавенцев зæрдыл æрлæууын кодта Кемеровойы æвирхъау цаутæ. Битарты Вячеславимæ сбæрæг кодта, базарадон центр “Алания Молл”ы адæмы æдасдзинадæн цы уавæртæ конд ис, уый. Æнæнхъæлæджы цауты министрады специалисттæ бамбарын кодтой, сæ кусджытæ 44 объекты кæй басгæрстой, уый. Сæйрагдæр бирæ адæм кæм æмбырд кæны, уыцы объекттæ.
Зынсирвæзтыты ныхмæ цы мадзæлттæ саразæн ис, уый равдыстой бынаты, ахуырон фæдис расидгæйæ. Спайда кодтой ирвæзынгæнæн æвæстиаты цæуæнтæй.
Адæмы æдасдзинады тыххæй Олег Белавенцев æмæ Битарты Вячеслав фæстæдæр аныхас кодтой. Æрцыдысты иу хатдзæгмæ: ныййарджытæ сæ сывæллæттимæ улæфынмæ кæдæм цæуынц, уыцы бæстыхæйтты æдасдзинадмæ здахын хъæуы уæлдай æргом.
Олег Белавенцев ма бабæрæг кодта Сыгъдæг Георгийы аргъуан. Ныхас цыд Аланийы аргъуыды 1100-йæм азы бæрæгбонмæ арæзт мадзæлттыл. Æххæстбарджын минæварæн куыд радзырдтой, афтæмæй аргъуаны агъуыстытæ уыцы рæстæгмæ саив кæнын хъæудзæн. Ахсджиаг у уыцы `мгъуыдмæ Александр Невский куывддоны арæзтад кæронмæ ахæццæ кæнын. Нырма уал куыстытæ цæуынц архийерейты резиденцийы Церетелийы уынджы.
Брытъиаты Феликс
