Дзæуджыхъæуы кадджын уавæры байгом кодтой зындгонд паддзахадон кусæг Михаил Лорис-Меликовы мемориалон фæйнæг. Мадзал сбастой Цæгат Кавказы æрмдæсныйæдты фыццаг училищæйы 150 азы юбилеимæ.
Терчы облæсты сæргълæууæг, инæлар-адъютант, Михаил Лорис-Меликов ахуырадон кусæндон сарæзта йæхи фæрæзтæй. Номдзыд æфсæддон разамонæг, Дзæуджыхъæуы кадджын цæрæг, Уæрæсейы мидхъуыддæгты министр, Лорис-Меликов ахуырад æмæ культурæйы райрæзтмæ бахаста стыр æвæрæн. Мадзалмæ æрбацыдысты нæ республикæйы хицауад, дины, æхсæнадон организациты минæвæрттæ, стæй ахуырадон æмæ сфæлдыстадон интеллигенци.
Уыдысты ма дзы Цæгат æмæ Хуссар Ирыстоны национ æмæ культурон æхсæнадтæ, стæй сомихæгты цæдисы минæвæрттæ Уæрæсейы алы горæттæй. Кадджын уазджыты ‘хсæн уыд Арменийы генералон консул Хуссар Федералон зылды Вардан Асоян. Йæ ныхæстæм гæсгæ, ахæм мадзæлттæ нæ бæстæты ‘хсæн ахастдзинæдтæ фидар кæнынæн пайда сты. Мадзал саразыны хъæппæрис разынд сомихаг националон-культурон æхсæнад «Эребуни» æмæ нæ республикæйы национ ахастдзинæдты министрадмæ. Æмæлгæ æххуыс сын бакодта Дзæуджыхъæуы администраци.
