Компани «Леруа Мерлен» тагъд рæстæджы йæ дуæрттæ байгом кæндзæн Дзæуджыхъæуы. Республикæйы цæрджытæн дзы фæзындзæн бирæ куысты бынæттæ. Абон та уал компанийы кусджытæ Хетæгкаты Къостайы номыл парчы сарæзтой фестиваль «Школа ремонта», зæгъгæ. Мадзалмæ æрбацыдысты мин адæймагæй фылдæр. Се ‘хсæн уыдысты алы кары адæймæгтæ дæр. Се `ппæты дæр базонгæ кодтой компанийы продукциимæ. Абон парчы куыста не сфæлдыстадон къорд. Цы йæ `мбæхсон, уацхæссæджы хæстæ мын мæхицæн бабар кодтой.
Ам фенæн ис алыхуызон хæдзарон къæйдуртæ, специалисттæ равдисдзысты сантехникæ, кæнæ ламинат куыд æвæргæ у, уый. Уæдæ дидинджытæ чи уарзы, уыдонæн та фенын кæндзысты зайæгойтæм зилыны мадзæлттæ. Иу ран декоративон сæрстыты хуызтыл ахыр кæнынц, иннæ ран – хæдзары мидæггаг къултæ фæлындыныл.
Дæсныйад æвдисæг ахуыртæ «Мелæй конд фæйнæг», зæгъгæ, сарæзтой, сфæлдыстадмæ æмхиц чи у, уыцы адæмæн. Ацы цатыры сæ зæрдæмæ фæцыд сывæллæттæн. Сæ ныййарджытимæ сæ бон уыд скæнын мелæй конд фæйнæг æмæ йæ хæдзармæ ахæссын.
Фестиваль «Школа ремонта» Дзæуджыхъæуы сæйраг парчы сарæзта компани «Леруа Мерлен». Бабæрæг кæнын æй уыд алкæй бон дæр. Дзæуджыхъæуы цæрджытæн радзырдтой компанийы тыххæй, базонгæ сæ кодтой сæ продукциимæ. Уæ зæрдыл уын æрлæууын кæндзыстæм, арæзтадон æрмæджытæ уæйгæнæг компани «Леруа Мерлен» Дзæуджыхъæуы байгом уыдзæн 30-æм августы.
Зындгонд егъау компани «Леруа Мерлен» у, дунейы алы бæстæты арæзтадон æрмæг асламдæр æргътæй чи уæй кæны, уыцы бренд. Ног дуканийæн радих кодтой зæххы хай 13 мины æмæ 700 квадратон метры. Нысанмæ гæсгæ инвестициты бæрц уыдзæн 800 милуан сомы. Фæзындзæн сæм 180 куысты бынаты. Алы аз бюджетмæ цæудзæн 50 милуан сомы онг хъалонтæ.
Компани Ирыстоны йæ куыст кæй райдайдзæн, уый нæ республикæйæн ахъаззаджы хос уыдзæн. Бюджетмæ æфтиæгтæ, куысты бынæттæ æмæ нæ адæмæн хæрзхъæд арæзтадон æрмæджытæ кæй уыдзæн, уымæй.
