Дзæуджыхъæуы уыдис «Аланские скауты», зæгъгæ, проекты презентаци. Мадзалы аразджытæ сты нæ республикæйы æхсæнадон палатæйы æмæ хæрзаудæн фонд «Успение», зæгъгæ, уый уæнгтæ. Проект сæхæст кодтой президенты грант райсыны фæстæ. Йæ хæс у, цæмæй рæзгæ фæлтæры æфтауой æнæниз цардыуагыл, хæрзмæ ахадой адæмы мидварны хæзнатыл.
Президенты грант рамбулын сын бантыст бирæ курдиæтты `хсæнæй. Уымæй дæр бæрæг у, куыд ахсджиаг æмæ хъæугæ куыст у, уый. Суанг ма хъæппæрисы архайджыты сæрмагонд уæлæдарæсæй дæр сифтонг кодтой. Фидæны йæ амидингæнджытæ фæнд кæнынц амынд проект уæрæхдæр æмæ йæм ноджы фылдæр фæсивæды сразæнгард кæнын. Бафтаудзыстæм мæ уый, æмæ мадзалы архайдтой æндæр регионтæй уазджытæ дæр.
Проекты разамонæг Хохойты Этери: «Фæнды нæ, цæмæй нын нæ проекты кой иууылдæр фехъусой. Цæмæй йæм канд рæзгæ фæлтæр ма разæнгард кæной, фæлæ ма æхсæнадон организациты æмæ хицауадон кусæндæтты минæвæрттæ дæр. Æвзæрæй дзы ницы ис. Уый нæ, фæлæ ма хорз хъуыддæгтыл æфтауæм куыд сывæллæтты, афтæ сæ ныййарджыты дæр. Суанг ма райдиан æфсæддон цæттæдзинад дæр райсынц».
