Дыууæ мæйы фæстæ йæ тыхы бацæудзæн ног закъон фæндæгтыл нывгонд нысæнтты тыххæй. Фæзындзæн дзы ног хуызтæ. Бур æмæ урс хуызмæ ма бафтаудзысты æрвхуыз цъæх дæр. Фыццаджыдæр сæ фенæн уыдзæн рæвдауæндæтты, скъолаты æмæ æндæр ахуыргæнæндæтты цур. Ног закъонæвæрды сæйраг нысан у, фистæгцæуджыты æдасдзинадмæ уæлдай цæстдард кæй хъуамæ уа, уый. Æндæр хуызы нысæнттæ шофырты нæ бауаддзысты фæзилæнтæй арæнты сæрты хизын. Уымæй уæлдай ма нысæнттæ фæуæрæх кæндзысты. Пайда кæнын райдадзысты, термопластик кæй хонынц, уыцы æрмæгæй. Уый фылдæр æмгъуыды фаг кæны. Ныр ма уал ахæм нысан скодтой Мæскуыйы уынджы.
Дзæуджыхъæуы администрацийы фæндæгты фонды директор Дзуццаты Тимур: «Куыст райдайдзыстæм афойнадыл. Ныртæккæ боны ахаст фæхуыздæр уыдзæн, фæхъармдæр уыдзæн. Нысæнттæ æвæрæн ис, уæлдæфы температурæ 16 градусæй дæлдæр куы нæ уа, уæд. Цæмæй хуыздæр фæхæца. Куыстытæ чи кæндзæн, уый дæр бæрæг у – специалисттæ нæм æрцæудзысты Оренбургæй».
