Ирон æвзаг рахæссын дунейы наукон æмæ культурон пайдакæнынады тыгъдадмæ, уыимæ ма ирон литераторты æрыгон æмæ курдиатджын фæлтæр раиртасын. Абулькасим Фирдоусийы зындгонд эпопейæ «Шахнаме»-йы хъайтартæ Рустам æмæ Сухраб сдзырдтой иронау. Поэмæйы тæлмацыл бакуыстой æрыгон фæсивæд — Дарчиты Хетæг, Рæмонты Алинæ æмæ Аслӕмырзатӕ Дзерассæ. Уый къухы бафтыд паддзахадон программæ «Национально-культурное развитие осетинского народа»-йы фӕрцы. Æххæст æй кæны Цæгат Ирыстоны Националон политикæ æмæ æддагон бастдзинæдты министрад.
Ацы рæнхъытæ сты Фирдоусийы поэмæ «Шахнаме»-йæ. Ныр æй уыдзæн бакæсæн ирон æвзагыл дӕр. Ахæм хуызы фæсарæйнаг паддзахæдтимæ бастдзинад фидар кæнын у республикæйы Национ ахастдзинæдты фарстаты фæдыл министрады хъæппæрис. «Ирон адæмы национ-культурон райрæзт»-ы паддзахадон программæйы фæлгæты сфæнд кодтой фæсарæйнаг литературæйы зындгонддæр авторты уацмыстæ ратæлмац кæнын. Райдыдтой Фирдоусийы зындгонд уацмысæй.
Поэмæ «Шахнаме»-йы тæлмацыл иумæйаг куыст бакодта æрыгон курдиатджын фæсивӕды къорд. Сæ сæйраг хæсыл нымадтой уацмысы мидис æххæстæй равдисын, уыимæ бакусын рæнхъыты ӕнӕаипп ритмикон равӕрдыл.
Фӕсивӕды фарсмӕ ӕрбалӕууыдысты хистӕртӕ кары специалисттӕ. Сӕ фæлварæн куыстæн сын аргъгӕнӕг дӕр уыдысты ӕмӕ амонӕг дæр. Кæд æнцон нæ уыд, уæддæр æрыгон тæлмацгæнджытæ зæрдæргъæвдæй бакодтой сæ куыст. Æмæ æрцыдысты ахсджиаг хатдзæгмæ — «Шахнаме» иронау сдзырдта.
Тагъд рӕстӕджы уал иронау бакæсæн уыдзæн эпопейӕ «Шахнаме», фæлæ зӕрдӕ дарæм, сæрмагонд паддзахадон программæйы руаджы дунеон классикты уацмыстæ дæр нæ мадæлон æвзагыл кæй уыдзæн фенæн, ууыл.
Дзæдзойты Фатимæ
