Нуазыны доны фарста тыхсын кæны Хъæдгæроны цæрджыты. Адæм тыхсынц, нæй сын æрвылбоны цардыуагæн уавæртæ. Дыууæ азы размæ хъæуы уыд дондзæуæн системæйы цалцæг, хæдзæрттæ ног хæтæлтæм баиу кодтой, фæлæ сæм дон афтæ дæр нæ ракалд. Уавæр ныртæккæ куыд у, уый зонынц не ‘сфæлдыстадон къорды уæнгтæ.
Хæринаг скæнын кæнæ цай бацымын – Хъæдгæроны цæрджытæй сæ фылдæрæн стыр хорзæх у. Хæдзæртты афтид мигæнæн не ссардзынæ, се ‘ппæты дæр æмбырд кæнынц ласæггаг дон. Ахӕм хуызы, куыд сæ бон у, афтӕ æххæст кæнынц хæдзары æрвылбоны куыстытæ. Къуылымпыдзинæдтыл дыууæ мæймæ цæрджытæ фæцахуыр сты. Фæлæ æххуысы фæдыл кæмæ ныххъæр кæной, уый нал зонынц.
Хæтæлтæ дыууæ азы размæ баивтой, фæлæ райхалинаг фарстатæ, фылдæр йедтæмæ, къаддæр нæ фесты. Цæрджыты ныхæстæм гæсгæ, кæд зæронд дондзæуæн хызæгтæ къулымпытимæ куыстой, уæддæр дзы дон калд. Цалцæджы фæстæ та хæдзæртты дон уæвгæ дæр нал ис. Диссагæн дзуринаг – гæрзтæ æхсынмæ дæр адæм цæуынц сыхаг хъæутæм.
Хъæдгæроны Хадыхъаты Ебæзайы уынгæй фылдæр райхалинаг фарстатæ никуы ис. Уазал бонты дон ласынц иннæ сыхтæй. Фос чи дары, уыдонæн та уæлдай зын у. Тухæнтæй адæм бафæлладысты. Хъæуы администраци уавæр зоны, фæлæ йыл хуыздæрырдæм сахадын сæ бон нæу. Куыд зæгъынц, афтæмæй дон чи уагъта, уыдон сæ куыст хорз нæ бакодтой.
Хъуыддаг йæ бынатæй фезмæлыд, хъæуы разамынд Дзæуджыхъæуы администрацимæ æххуысмæ куы фæсидт, уæд. Огъуаты Михаил куыд загъта, афтæмæй йын зæрдæ бавæрдтой, ног къуыри адæмы хæдзæртты дон кæй фæзындзæн, уымæй.
