Цӕгат Ирыстоны 11 педагогы хорзӕхгонд ӕрцыдысты “Уӕрӕсейы Федерацийы ахуырады къабазы Кадджын кусӕджы” номӕй

Сергей Меняйло раарфӕ кодта ахуыргӕнджытӕн сӕ профессионалон бӕрӕгбоны фӕдыл.  Республикӕйы сӕргълӕууӕг, чи фесгуыхт, уыцы кусджытӕн радта паддзахадон хӕрзиуджытӕ. Бирӕ азты ӕнӕзӕрдӕхудт фӕллой ӕмӕ ахуырады къабазы бирæ сгуыхтдзинӕдты тыххӕй Цӕгат Ирыстоны 11 ахуыргӕнӕгӕн саккаг кодтой “Уӕрӕсейы Федерацийы ахуырады къабазы Кадджын кусӕджы” ном. Се ‘хсæн Мӕздӕджы 7-ӕм скъолайы райдиан кълӕсты ахуыргӕнӕг Марина Антонова, Виноградное хъæуы скъолайы истори ӕмӕ ӕхсӕнадзонынады ахуыргӕнӕг Карен Арзуманов, Дзæуджыхъæуы 41-ӕм скъолайы райдиан кълӕсты ахуыргӕнӕг Æхполæтты Ирмӕ, центр “Эрудит”-ы сывӕллӕтты ирон ӕвзагыл ахуыр кӕныны хъомылгӕнӕг Джыккайты Инессӕ, 15-ӕм скъолайы директор Дулаты Маринӕ. Цӕгат Ирыстоны сгуыхт ахуыргӕнджытӕ та систы Дзӕуджыхъӕуы 22-ӕм скъолайы биологийы ахуыргӕнӕг Еналдыты Риганӕ ӕмӕ Беслӕны 6-ӕм скъолайы уырыссаг ӕвзаг ӕмӕ литературӕйы ахуыргӕнӕг Пагӕты Светланӕ.