Премьер-министр Дзанайты Барисы разамындӕй уыд ӕрвылкъуырион аппаратон ӕмбырд

Республикæйы артаджы ӕвӕрӕнтӕ сты дыууæ мин тоннӕйы бензин ӕмӕ иу мин цыппар сæдæ æстай авд тоннӕйы дизель. Уӕлӕмхасӕн регионмӕ ласынц ноджы иу мин дыууæ сæдæ фæндзай тоннӕйы бензин ӕмӕ иу мин аст сæдæ нудæс тоннӕйы дизель. Уый тыххæй аппаратон ӕмбырды фехъусын кодта цæрæнуатон-коммуналон хæдзарад, артаг æмæ энергетикæйы министры хӕстӕ рӕстӕгмӕ ӕххӕстгӕнӕг Хъараты Тимур. Къуырийы дæргъы “Газпром” артаг æрвыста афоныл. Станцæты радæн бæлвырд фæтк скæныны тыххæй Сергей Меняйло бабар кодта бархионты æххуысмæ фæсидын. Райсом Цæгат Кавказы хæххон-металлургон институты волонтертæ радгӕс цӕуын райдайдзысты “Роснефть” ӕмӕ “Газпром”-мӕ. Ныхас ма цыд хъармгӕнӕн афоныл. Зымӕгмӕ цӕттӕ сты дыууæ мин фараст сæдæ фæндзай æртæ бирӕфатерон хӕдзары. Æртæ сæдæ дыууын хӕдзары та ныртӕккӕ сыгъдӕг кӕнынц ныккӕндтӕ. Æрдзырдтой медицинӕйыл дӕр. Республикӕйы фӕзынд гриппæй рынчынтæ. Æртæ адæймагмæ та дохтыртӕ рабæрæг кодтой COVID-19. Скъолатӕ ӕмӕ сывæллæтты рӕвдауӕндӕттӕ иууылдӕр кусынц. Фембӕлды кӕрон æмбырды архайджытæ ӕрныхас кодтой паддзахадон программӕтӕ ӕххӕст кӕныныл.