Ивгъуыд къуырийы цауты тыххæй дзуапдæттæн докладтæ скодтой министрадтæ æмæ ведомствæты разамонджытæ

Цæгат Ирыстоны хицауады сæрдар Дзанайты Барисы разамындæй ацыд радон аппаратон æмбырд. Ныхас цыд ивгъуыд къуырийы куысты бæрæггæнæнтæ æмæ ног нысантыл. Ахуырады министрадæй фехъусын кодтой скъолатæ æмæ сывæллæтты рæвдауæндæттæ фæткмæ гæсгæ кæй кусынц. Республикæйы сæйраг санитарон дохтыр Тыбылты Аланы ныхасмæ гæсгæ, æхснырсæгæй рынчынты нымæц 9,4% фæкъаддæр. Фæлæ эпидемиологон уавæр нысангонд къæпхæнæй чысыл уæлдæр у нырма. Ивгъуыд къуыри коронавирус рабæрæг 7 адæймагмæ. Январæй нырмæ диспансеризаци ацыдысты 80 мин адæймаджы. Льготæмæ гæсгæ хостæн рецепттæ рафыстой 30 мин хатты. Арвыкомы фæндаг æппæт хæдтулгæтæн дæр гом у. Рады ис уæзласæн транспорты 1409 иуæджы, уыдонæй 570 — лæууæн бынæтты. Арæзтад æмæ архитектурæйы министрады бæрæггæнæнтæм гæсгæ, республикæйы фæнд кæнынц 192 объекты саразын æмæ рацаразын. Дзанайты Барис бабар кодта, цæмæй конракттæ фыст æрцæуой афойнадыл.