Абон зындгонд Мариинаг театр бæрæг кæны йӕ 240 азы. Уый фæдыл Сергей Меняйло арфæ ракодта нæ номдзыд æмзæххон, театры аивадон разамонæг, маэстро Гергиты Валерийæн. Цæгат Ирыстоны Мариинаг театры филиалæн ис дыууæ бæстыхайы: оперæ æмæ балеты театр, стæй концертон зал. Дыууæ бынаты дæр сты адæмæн уарзон. Æгас Цæгат Ирыстонæй аивадуарзджытæ дзы арæх æрбамбырд вæййынц.
Петербургы Мариинаг театры ног сценæйыл абон æвдисынц егъау гала-концерт сæ юбилейы фæдыл. Ацы сабаты та маэстро Гергиты Валерий, оперон труппæйы солисттæ æмæ Мариинаг театры симфонион оркестр рацæудзысты Дзæуджыхъæуы сценæмæ. Аивадуарзджытæ тынг æнхъæлмæ кæсынц ацы цымыдисаг культурон цаумæ.
