Бетховен æмæ Прокофьевы музыкæйæ байгом Мариинаг театры филиалы ног сезон. Æхсызгон ма уый, у æмæ уыцы бон йæ юбилей сбæрæг кодта Уæрæсейы аивæдты сгуыхт архайæг, дирижер Баскаты Хъазыбег. Æнусы ‘рдæгæй фылдæр кусы паддзахадон симфонион оркестры. Курдиатджын дирижеры юбилей бабæрæг кодта не ‘сфæлдыстадон къорд дæр.
Тыхджын къухæмдзæгъдæй сæмбæлдысты зындгонд ирон дирижер Баскаты Хъазыбегыл. Йæ 80 азы юбилей сбæрæг кæнынмæ æрæмбырд бирæ адæм. Мариинаг театры сценæйыл дирижеры схорзæхджын кодтой Ирыстоны намысы майданæй.
Паддзахадон симфонион оркестры Баскаты Хъазыбег дирижерæй кусы 1970-æм азæй нырмæ. Йе сфæлдыстадон къæбиц хъæздыг у цымыдисаг куыстытæй. Йæ æгæрон курдиат равдыста алыхуызон жанрты. Доницетти æмæ Рахманиновы оперæтæ. Уыимæ ма, сывæллæтты спектакльтæ. Дирижер куыд зæгъы, афтæмæй йæ цард æнæ музыкæйæ нал уыны.
Кадджын уавæры байгом кодтой театры ног сезон дæр. Бацæттæ кодтой Прокофьев æмæ Бетховены музыкæтæ.
Цæгат Ирыстоны Мариинаг театры ног сезон æнтыстджынæй байгом. Уæдæ бæркадджын æмæ цымыдисаг кæй уыдзæн, уый дæр дызæрдыггаг нæу. Æппæт дунейæ музыканттæ саккаг кæндзысты ацы аивадæн аргъгæнджыты зæрдæтæ балхæнынæн.
