Ирвæзынгæнджыты хæс – адæймаджы æвæстиатæй пырхыты бынæй суæгъд кæнын. Архайын хъæуы рæвдз æмæ арæхстгай. Æцæг уавæрты алы минут дæр ахсджиаг у. Специалистты æмархайдæй аразгæ у адæймаджы цард. Дарддæр – эвакуаци, хъыгдард баййафæджы рахæссынц æдас бынатмæ, уым ын бакæндзысты хъæугæ медицинон æххуыс.
Иннæ фæзы — фæндаггон фыдбылызы фæстиуджытæ аиуварс кæнын. Хæдтулгæйы ис дыууæ хъыгдард баййафæджы. Куыд тагъддæр сæ хъæуы æдас бынатмæ ракæнын. Æнæнхъæлæджы уавæрты министрады специалистты архайдмæ йæ цæст дары тæрхонгæнæг. Сæйраг домæнтæ – тагъдад æмæ хæрзхъæддзинад. Æдæппæтæй профилон министрады регионты ‘хсæн ерыстæ “Кубок Кавказа”-йы агурæн-ирвæзынгæнæн къæпхæны архайджыты хъæуы 9 зын фæлварæны баххæст кæнын.
Ерысты бынæттæй иу сси Дзæуджыхъæуы Доны станцæйы акватори. Фæлварæнты хыгъды – цы объекттæ фæдæлдон сты, уыдон ссарын, згъæрæй конд конструкцитæ сæмбырд кæнын, алыхуызон технологитæй пайда кæнгæйæ доны бын хъыгдард баййафæджы ссарын. Уæлдай зындæр та уыд доны бын акваланг баивгæйæ дæлдондзæуæджы эвакуаци.
Ерыстæ æрбангом кодтой 8 къорды Цæгат Кавказы регионтæй. Цалдæр бонмæ ацыдысты 5 фæлварæны. Алы къæпхæн дæр бынтон хæстæг у æцæг уавæртæм. Архайджытæн уый хорз фадат у сæ профессионалон арæхстдзинад равдисынæн, æмæ кæрæдзийæн фæлтæрдзинадæй фæхай кæнынæн. Ам алчидæр æвдисы йæ гæнæнтæ.
Ирвæзынгæнджыты регионты ‘хсæн ерыстæ нымад сты профессионалон дæсныдзинад сбæлвырд кæнынæн тæккæ зындæр фæзтæй иуыл. Ам алы архайæг дæр равдисы йæ гæнæнтæ æмæ фæразондзинад. Æмæ та ногæй сæхи цæттæ кæнынц зын уаврæты адæмæн æххуыс кæнынмæ.
