Республикæйы сæргълæууæг Сергей Меняйло фембæлд компани «Ростелеком»-ы вице-президент Сергей Мордасовимæ. Ныхас кодтой Цæгат Ирыстоны нымæцон инфраструктурæйы райрæзтыл. Сергей Мордасов радзырдта, социалон ахадындзинад кæмæн ис æмæ республикæйы цы проекттæ æххæст кæнынц, уыдоны тыххæй.
Се `хсæн цæрджыты æвæстиатон хъусынæгæнæн системæты куыст æнæнхъæлæджы уавæры рæстæг æмæ æдасдзинады системæты модернизаци ахуыргæнæндæтты. Бæрнон кусджытæ дзырдтой паддзахадон æмæ муниципалон лæггæдтæн электрон хуызмæ раивын, уынгты рухсгæнæн системæты сног кæнын æмæ цæрæнуæтты коммуналон къабазы куыстæн иу онлайн платформæ саразыныл.
Дзæуджыхъæу, Алагир æмæ Мæздæджы æнтыстджынæй кусы «Ростелекомы» арæзт видеоцæстдарæн системæ. 400 видеокамерæйы кæсынц æхсæнадон бынæтты уагæвæрдмæ æмæ пандемийæйы рæстæг маскæтæ дарыны фæткмæ. Системæ бæрæг кæны аиппытæ. Компани фæнд кæны ахæм системæтæ районты дæр сæвæрын. Проект сæххæст кæнынæн фидаргонд æрцæудзæн фæндаггон картæ.
Сергей Меняйлойы ныхæстæм гæсгæ, регионы хъуамæ нымад уа, нырыккон нымæцон технологтимæ æмдзу чи кæны, ахæмыл. Ахсджиаг у скъолаты æмæ уынгты æдасдзинадыл бакусын, рынчындæттæ æмæ поликлиникæты куысты хъомыс фæуæлдæр кæнын дæр. Уыцы хъуыддаджы та «Ростелеком» у, йæхиуыл чи баууæндын кодта, ахæм компани.
