Ныхмæлæуд æнцон нæу – армстъолы уæлхъус хуыздæрты хуыздæртæ. Республикæйы иугонд командæ равдыста иттæг хорз бæрæггæнæнтæ – 1 бынат иумæйаг хыгъды Уæрæсейы чемпионаты Орелы. Ацы аз нæ регионы кад хъахъхъæдтой 38 спортсмены.
17 аздзыд Персаты Каролинæ хæцы 70 килограммы уæзы. Фарон бæстæйы чемпионаты чызг фыццæгты хыгъдмæ нæ бахауд. Фæлæ уæд йæхицæн нысан сæвæрдта, иннæ хатт æнæмæнг кæй рамбулдзæн, уый. Куыд хатдзæг – сыгъзæрин майдан, финалы рахиз къухæй хæцыд Байаты Марияимæ. Галиуæй та
бацахста дыккаг бынат, фæхæрд Дзуццаты Елизаветæйæн. Тренеримæ иумæ спортсменкæ бакусдзæн йæ рæдыдтытыл æмæ йæ дæсныдзинад фæуæлдæр кæндзæн.
Ахæм егъау ерыстæм фæцæттæ кæнынц бæстонæй. Æрвылаз æнæрлæугæ тренировкæтæ фæлтæрдджын разамонджытимæ. Тренерты штабы æрыгæттыл сæ зæр дæ дардтой. Фæсивæд хæцыдысты фæлтæрдджын спортсментимæ. Чемпионаты æдæппæтæй архайдтой 500 адæймагæй фылдæр.
6 сыгъзæрин , 4 æвзист æмæ 6 бронзæ майданы Уæрæсейы чемпионаты – æцæг триумф. Фæлæ сæ æнтыстдзинæдтыл æрлæууынмæ нæ хъавынц. Фæззæджы Индийы уыдзæн дунейы чемпионат. Тренертæ æмæ спортсментæ дызæрдыг нæ кæнынц: армрестлингы ирыстойнаг скъола ногæй равдисдзæн бæрзонд цæттæдзинад.
