Ахсджиаг мадзалы размæ традицимæ гæсгæ гимнты зæлд. Сывæллæттæ æвзарынц къорды президенты. Кандидаттæ бæрæг сты, фæлæ ма райдайыны размæ хъомылгæнджытæ иу хатт зæрдыл æрлæууын кодтой фыццаградон хъуыддæгтæ: чи у президент, цы сты æвзæрстытæ æмæ хъæлæс раттын куыд хъæуы, уый. Сабитæ дæттынц бæлвырд дзуæппытæ.
Алцыдæр фæткмæ гæсгæ: къухты паспорт æмæ граждайдаг бар сæххæст кæнын фæнд. Участочы къамисы æвзонг уæнгтæ бацæттæ кодтой бюллетеньтæ æвзарджыты номхыгъдмæ гæсгæ. Бæрæггæнæнтæ сфæлхат кодтой æмæ сабитæ сæ къух æрфыстой. Хъæлæстæ сбæрæг кæныны фæстæ къорды президент сси Мсойты Дианæ. Ацы ахсджиаг мадзалмæ сывæллæттæ сæхи цæттæ кодтой къуыри. Хъомылгæнджыты ныхæстæм гæсгæ сæ сæйраг нысан æххæстгонд æрцыд.
Паддзахадон æвзарæн системæйы фæдыл архайдмæ каст территориалон æвзарæн къамисы сæрдар. Куыст ацыд æнæ къылымпытæй, фæткхæлдтытæ нысангонд не ‘рцыд.
Камбилеевкæйы 1-æм скъолайы та хистæркъласонтæн бацæттæ кодтой сæрмагонд фембæлд. Æвзарджыты барты тыххæй сын радзырдта Горæтгæрон районы территориалон къамисы уæнг Осиаты Давид.
Къласы сахат пайда рауад Кокойты Богданæн дæр. Æвзæрстыты архайын йæ бон суыдзæн афæдз фæстæ. Фæлæ йæ урокы бæстон бамбæрста, граждайнаг хæс сæххæст кæнын ахсджиаг цæмæ у, уый.
Апрель Цæгат Ирыстоны снысан кодтой æвзонг æвзарæджы мæйæ. Æдæппæтæй республикæйы скæндзысты дыууæ сæдæ ахæм мадзалæй фылдæр.
Республикæйы уæлдæр æмæ астæуккаг профессионалон ахуыргæнæндæттæ суыдзысты лекциты æмæ фембæлдтыты фæзтæ. Нысан у иу — фидæны æвзарджыты бацæттæ кæнын. Мæйæн кæронбæттæн скæндзысты Цæгат Кавказы егъау форумæй.
