«Цæгат Ирыстоны физкультурæ æмæ спорты» закъон куыд æххæст кæнынц æмæ цавæр зындзинæдтæ æмæ гæнæнтæ ис ацы къабазы? Ацы фарстаты фæдыл уыд парламентон байхъуыстытæ. Амыдта сæ Тускъаты Таймураз. Æмбырды архайдтой парламенты депутаттæ, республикон хицауады æмæ бынæттон хиуынаффæйады уæнгтæ, зонадон æмæ ахуырадон уагдæтты минæвæрттæ.
Ныхас цыд дзыллон спорты æмæ спортивон инфраструктурæйы райрæзтыл. «Спорт — царды нормæ», зæгъгæ, проекты æххуысæй Æрыдоны байгом нырыккон спорткомплекс. Рахай йын кодтой 246 млн сомы. Цæгат Кавказы федералон зылды социалон-экономикон райрæзты стратегийы фæлгæты Дзæуджыхъæуы фæзындзæн дыууæ физкультурон-дзæбæхгæнæн комплексы. Сæ иу уыдзæн республикæйы Спортивон хъæбысхæсты центры бындурыл. Се ‘нæниздзинад хъыгдард кæмæн у, уыцы адæмæн дзы сараздзысты бассейн.
Уымæй уæлдай, хицауады хæдзары бацæттæ кодтой Цæгат Ирыстоны спортивон æнтыстыты равдыст. Равæрдтой дзы бынæттон, Уæрæсейы æмæ дунейы æмвæзадыл ерысты нæ фæсивæд цы майдантæ, рӕттӕ ӕмӕ кубоктæ рамбылдтой, уыдон.
